जय जोहार। सीएम भूपेश बघेल (CM Bhupesh Baghel ) ह आज रायपुर दक्षिण विधानसभा म भेंट-मुलाकात के दउरान भाठागांव म 80 एमएलडी क्षमता के नवा जल शुद्धिकरण संयंत्र के लोकार्पण करीन । ये संयंत्र छत्तीसगढ़ के पहिला जीरो वेस्ट, वॉटर ट्रीटमेंट प्लांट हे । कार्यक्रम म वोहा ठोस अपशिष्ट प्रबंधन बर नगर निगम रायपुर के 9 बैक हो लोडर गाड़ी ल घलो हरी झंडी दिखाके रवाना करीन ।
अत्याधुनिक जल शोधन संयंत्र ल लगभग 15 करोड़ 86 लाख रुपिया के लागत ले तईयार करे गेहे । ए संयंत्र के संचालन ल लैमेला ट्यूब सेटलर पद्धति ले करे जाही । ये पूरा तरह ले स्वचलित प्रणाली म आधारित हे । संयंत्र ले प्राप्त जल ले शहर के देवेन्द्र नगर, मोतीबाग, नलघर, बैरनबाजार, संजय नगर अउ मठपुरैना के छह ठन बड़का टंकी ल भरे जाही अउ जेखर ले शहर के बड़का आबादी ल शुद्ध अउ साफ पेयजल उपलब्ध हो पाही ।
मुख्यमंत्री ह नवनिर्मित जल शोधन संयंत्र के संचालन के पूरा प्रक्रिया अउ तकनीकी जानकारी लीन अउ कंट्रोल रूम के अवलोकन घलो करीन । ए मउका म घलो वोहा भाठागांव म ही दू ठन पूराना जल शोधन संयंत्र के उन्नयन के बाद एला लोकार्पित करीन । ए पूराना जल शोधन संयंत्र के क्षमता ल बढ़ाए गेहे ।
