CM Bhupesh Baghel ह करिन अक्ति तिहार म माटी पूजा
जय जोहार। सीएम भूपेश बघेल (CM Bhupesh Baghel) ह आज इंदिरा गांधी कृषि विश्वविद्यालय परिसर म आयोजित अक्ती तिहार अऊ माटी पूजन दिवस के कार्यक्रम संघराईन। ए बेरा म गांव के माटी, देवी देवता के पूजा के संगे संग लौकी, सेम, तोरई के बीज ओमन बोईन। उहें टेक्टर लगाके ओमन एख घांव अऊ साबित कर दिन कि ओ ह मुख्यमंत्री बने के बाद भी अपन माटी के बुता ल नई भूले हे। ओमन ह खेत के जोताई घलो करिन।
सीएम ह करिन इंदिरा बीज ब्रांड लॉन्च
मुख्यमंत्री भूपेश बघेल ह इंदिरा गांधी कृषि विश्वविद्यालय डाहर ले विकसित करे गे इंदिरा बीज ब्रांड ल घलो लांच करिन। ओमन कहिन कि पूरा भरोसा हे कि विश्वविद्यालय कोती ले बनाए गे बीच ह किसान मन बर लाभकारी होही। ए अवसर म मुख्यमंत्री ह किसानी के शोध म आधारित कॉफी टेबल बुक के विमोचन तको करिन। मुख्यमंत्री ह कहिन जब हमन गोबर खरीदी के सुरुआत करे रेहेन त लोगमन मन मजाक उड़ात रहिस फेर आज 3 लाख लोगन मन गोबर बेचत हे। 230 करोड़ रुपिया ओखर खाता म पहुंच चुके हे। मिलेट्स ल बढ़ावा देबर सरकार कारगर कदम उठावत हे। इंदिरा गांधी कृषि विश्वविद्यालय म मिलेट्स कैफे संचालित होवत हे अऊ जल्दी इंदिरा गांधी कृषि विश्वविद्यालय अऊ एम्स के बीच होए समझौता ले एम्स म घलो मिलेट्स कैफे खुलही। एखर ले उहां के मरीज मन ल मिलेट्स ले बने पोषक आहार उपलब्ध होही।
कृषि मंत्री रविन्द्र चौबे ह कहिन कि आज के दिन हमन धरती के पूजा करथन। आजे के दिन खेती म बीज डाले के मुहुर्त होथे। हमन कई बछर ले ए बुता ल करत आत हन। आज अक्ति के दिन ए बिसेस आयोजन करे गे हे। ओमन कहिन कि छत्तीसगढ़ के ओ परंपरा ह पुनर्जीवित करे गे हे जेन हमर मूल परंपरा हे। हमर सरकार किसान हितैशी नीति मन के सती किसान मन के संख्या ह बाढ़े हे। उत्पादन घलो बाढ़े हे एखर परिणाम ए होईस कि 170 मीट्रिक टन धान के खरीदी होए हे जो देशभर म अभूतपूर्व रिकार्ड हे।
