रायपुर। मुख्यमंत्री डॉ. रमन सिंह ह प्रदेश व्यापी विकास यात्रा म सोमवार के जिला मुख्यालय जशपुर म आयोजित विकास प्रदर्सनी के स्टाल म जशपुर जिला के ग्राम साराडीह के किसान मन ले मुलाकात करिन। ये किसान मन अपन जमीन म चाय के खेती करत हें। मुख्यमंत्री ह किसान मन के हालचाल पूछिंन। डॉ. सिंह ल किसान मन ह बताइन के गांव म पैदा करे गए चाय के ब्रॉडिंग साराडीह चाय के नाम ले करे गए हे। किसान मन ह मुख्यमंत्री ल साराडीह चाय के पैकेट भेंट करिन। किसान मन ह ये घलोक बताइन के ए चाय के दू किस्म ग्रीन टी अऊ सामान्य चाय के बिक्री करे जात हे। मुख्यमंत्री ह किसान मन ल शुभकामना दीन।
हम आप मन ल बता देवन के जशपुर जिला के साराडीह गांव म स्थानीय किसान मन के भागीदारी ले वन विभाग कोति ले 20 एकड़ म चाय के खेती शुरू करे गए हे। मुख्यमंत्री ह वन विभाग के स्टॉल म ए चाय बागान के मॉडल के अवलोकन करिन। ए अवसर म केन्द्रीय इस्पात अउ खनन राज्य मंत्री विष्णुदेव साय, गृह, जेल अउ लोक स्वास्थ्य यांत्रिकी मंत्री रामसेवक पैकरा, राज्य सभा सांसद रणविजय सिंह जूदेव, सरगुजा अउ उत्तर क्षेत्र आदिवासी विकास प्राधिकरण के उपाध्यक्ष राजशरण भगत संग अब्बड़ अकन जनप्रतिनिधि उपस्थित रहिन।
