सुशासन के मोटरसाइकिल ले दुरिहा पहाड़ तक पहुँचीन कलेक्टर-एसपी

गोंडेरास अउ नीलावाया में ऐतिहासिक सुशासन चउपाल

रायपुर, छत्तीसगढ़ सरकार के सुशासन तिहार 2026 अभियान के तहत अब विकास के अंजोर सिरिफ दफ्तर तक सीमित नई हे, बल्कि सीधा दुरिहा वनांचल तक पहुँचत हे। एही कड़ी में सुकमा जिला प्रसासन ह संवेदनसीलता के एक नवा मिसाल पेस करिस। बुधवार के कलेक्टर अमित कुमार अउ पुलिस अधीक्षक किरण चव्हाण ह कोनो प्रोटोकॉल के चिंता करे बिना, खुद मोटरसाइकिल चलाके 30 किलोमीटर लंबे ऊँबड़-खाबड़ अउ कठिन रद्दा ला पार करिन अउ पहुँचविहीन गाँव गोंडेरास अउ नीलावाया पहुँचीन।

जिला प्रसासन ह सुशासन तिहार के जरिया 31 व्यक्तिगत योजना अउ 14 सामुदायिक सुबिधा ला सीधा गाँव वाले मन के दुआर तक पहुँचावत हे। कलेक्टर अउ एसपी के ए दौरा ह साबित करथे कि जब प्रसासन संवेदनसीलता के संग दुरिहा ला मिटाथे, त जनता के मन में बेवस्था कोती भरोसा अउ बदलाव के नवा उम्मेद जागथे।

गाँव गोंडेरास में आमा-इमली के छाँव में समस्या के तुरते समाधान

गोंडेरास गाँव में कलेक्टर अउ एसपी ह कोनो बड़े मंच के जगह इमली के रुख के नीचे बिछाय गे खाट में बइठ के गाँव वाले मन ले सीधा गोठ-बात करिन। गाँव वाले मन कोती ले सोलर प्लेट के खराब होय के सिकायत ऊपर कलेक्टर ह तुरते क्रेडा विभाग ला सबो घर में मरम्मत करे के निर्देश दीन। गाँव में आंगनबाड़ी अउ पंचायत भवन जइसन बुनियादी काम बर 70 लाख रूपिया के मंजूरी दिय गिस, जेकर जिम्मेदारी ग्राम पंचायत ला ही सौंपे गे हे। सिबिर में 17 किसान क्रेडिट कार्ड, 12 जाति परमान पत्र अउ 11 पीएम-किसान मामला के निपटारा, 2 किसान किताब, 2 पटवारी प्रतिवेदन संग कतको कागज ला ओही मेर बाँटे गिस।

स्वास्थ्य सुरक्षा अउ पुलिया के सौगात

गाँव नीलावाया पहुँच के अधिकारी मन ह भुइँया में बइठ के चउपाल लगाइन। बरसात के दिन में गाँव वाले मन ला होवइया 15 किमी के जादा दुरिहा ला खतम करे बर कलेक्टर ह ओही मेर नाला ऊपर पुलिया बनाय के मंजूरी दीन। 4 मोतियाबिंद मरीज ला जिला अस्पताल भेजे अउ गरभवती महिला मन के सुरक्षित जचकी बर सचिव ला कड़ा निर्देश दिय गिस। सिबिर के बखत 2 गरभवती महिला मन के गोद भराई के रस्म पूरा करे गिस अउ 22 लइका मन के जनम परमान पत्र तुरते बनाके सौंपे गिस।

कागजी नई, भुइँया के सुशासन हमर लक्ष्य

कलेक्टर अमित कुमार ह गाँव वाले मन ले कहिन कि सासन के लक्ष्य ‘नियद नेल्ला नार’ (तुहर अच्चा गाँव) योजना के जरिया हर घर ला बिजली, पानी अउ स्वास्थ्य सुबिधा ले जोड़ना हे। ओमन साफ कहिन कि स्थानीय पंचायत ला निर्माण एजेंसी बनाना काम में तेजी अउ पारदरसिता लाय कोती एक बड़े कदम आय। गाँव के सरपंच जोगा वंजामी ह अधिकारी मन के आय ला ऐतिहासिक बतावत कहिन कि— “ए ह पहिली बार आय जब कोनो कलेक्टर हमर गाँव तक मोटरसाइकिल में पहुँचे हे। अब हमन ला भरोसा हे कि हमर समस्या मन अनसुनी नई रहिही।”