Lockdown: राजधानी रायपुर म 21 सितम्बर ले लगही लॉकडाउन, आम जनता मन ल नई मिले ये सुविधा, पढो पूरा खबर
जय जोहार…. कोरोना संक्रमण के बाढ़ते मामला ल देखत हुये कलेक्टर एस भारतीदासन ह आज सख्त लाकडाउन (Lockdown) के ऐलान करे हे। कलेक्टर ह बताइस कि राजधानी रायपुर म 21 सितंबर के रात 9 बजे ले 28 सितंबर तक लाकडाउन होही। ए दौरान सबो दुकान ह बन्द रही। सिरिफ कुछु दुकान ल कुछु समय बर खोले जाही।
रायपुर कलेक्टर एस भारतीदासन ह बताइस कि ए बार के लाकडाउन (Lockdown) म पहिले ले जादा सख्ती बरते जाही। सिरिफ दूध के सप्लाई, मेडिकल दुकान अऊ पेट्रोल पंप ह तय समय तक खुलही। बता दन कि पेट्रोल पंप म इमरजेंसी सुविधा अऊ एम्बुलेंस ल ही पेट्रो ल दे जाही। आम जनता बर पेट्रोल पंप नई खुलही। ए दौरान लोगन मन ल पेट्रोल नई मिलही।
कलेक्टर ल लोगन मन ले अपील करे हे कि लाकडाउन (Lockdown) लागू होय ले पहिले एक सप्ताह बर अपन राशन के स्टोर कर के रख ले। दूध बर बिहिनिया अऊ शाम डेढ़ घंटा के समय मिलही। पेट्रोल, एलपीजी अऊ मेडिकल स्टोर ल छोड़ के बाकी सबो तरह के व्यवसाय ह बन्द रही।
