रायपुर. प्रदेश कांग्रेस प्रभारी पीएल पुनिया ह आज पहुना म मंत्री मन ले सीधा संवाद के बाद राजीव भवन पहुंचिन अऊ भूपेश बघेल सरकार के कामकाज के जमके तारीफ करीन। ए दउरान ओमन ह सरकार ल 10 म 10 नंबर घलो दे दिन। ओमन ह नरवा, गरवा, घुरवा अऊ बारी योजना ल सफल प्रयास कहिन। ओमन कहिन कि ए नवा प्रयोग होए हे अऊ ए ह सरकारी नई बल्कि स्थानीय लोगन मन के योजना हरे।
प्रेसवार्ता म ओमन बताईन कि मंत्री मन के 6 महीना के कामकाज ल लेके चर्चा होईस। जेमा राज्य सरकार के महत्वाकांक्षी योजना नरवा, गरवा, घुरवा अऊ बारी ल लेके घलो ओखर मन ले चर्चा करे गिन। ए योजना के दूरगामी परिणाम होही। अऊ ए ह गांव के तरक्की बढ़ाए वाला योजना होही।
ए दरी ओमन मंत्री मन के मुलाकात के उल्लेख करत कहिन कि 6 महीना के जम्मो कामकाज ल लेके मंत्री मन ह जानकारी दिन हे। संगे-संग अवईया कार्य योजना के बारे म घलो बताईन। ओमन कहिन कि तीन दिन के मोर ए दउरा हे सफल रहिस। आप मन ल बता देन कि ए दउरान ओखर मन संग शिक्षा मंत्री प्रेमसाय सिंह टेकाम, प्रदेश अध्यक्ष मोहन मरकाम अऊ अरूण उरांव घलो मउजूद रहिन।
