मुख्यमंत्री बघेल किहिन- सबो दल के लोगन संग आत्मीय रिहिस जेटली जी के, डॉ रमन किहिन भगवान ओला अपन चरन म राखंय

नई दिल्ली/रायपुर। देस के पूर्व वित्त मंत्री अउ भाजपा के दिग्गज नेता अरुण जेटली के सनिवार के दिल्ली एम्स म निधन होगे। ओमन 66 साल के रिहिन। जेटली जी हा 9 अगस्त ले एम्स म भर्ती रिहिन। बीते दिन राष्ट्रपति रामनाथ कोविंद, प्रधानमंत्री नरेंद्र मोदी अउ गृह मंत्री अमित शाह समेत कई नेता मन उंकर हालचाल जाने बर अस्पताल पहुंचे रिहिन।

राष्ट्रपति रामनाथ कोविंद हा किहिन कि अरुण जेटली बेहतरीन वकील, परिपक्व सांसद अउ उत्कृष्ट मंत्री रिहिन। गृह मंत्री अमित शाह का किहिन कि में हा अपन परिवार के सदस्य ला गवां देंव। यूएई म मौजूद प्रधानमंत्री नरेद्र मोदी हा जेटली के पत्नी अउ बेटा ले फोन म बात करिन। जेटली के परिवार हा उंकर ले बिदेस दौरा रद्द मत करव कहिस।

छत्तीसगढ़ के मुख्यमंत्री भूपेस बघेल हा दुख जताए हें। अपन सोक संदेस म केहे हें कि अरुण जेटली जी के निधन हा भारतीय राजनीति बर अपूरणीय क्षति हे। अरुण जेटली कुसल वकील होय के साथ अपन लंबा राजनीतिक जीवन म अनेक पद मन सफलतापूर्वक काम करत देस के सेवा करिन हें। सबो दल के लोगन मन संग उंकर आत्मीय रिस्ता रिहिस।

प्रदेस के पूर्व मुख्यमंत्री डॉ. रमन सिंह हा घलो ट्वीट करके सोक व्यक्त करे हें। ओमन लिखे हें कि पूर्व वित्त मंत्री श्री अरुण जेटली जी के निधन समाचार पाके हिरदे ला गहरा दुख पहुंचे हे। में ईश्वर ले प्रार्थना करत हंव कि दिवंगत आत्मा ला अपन चरन म स्थान देवंय।