डॉ. रमन के नेतृत्व म नइ लड़े जाही चुनाव : सरोज पांडेय

मामला म कांग्रेस-भाजपा म बयानबाजी सुरू

बिलासपुर। छत्तीसगढ़ विधानसभा चुनाव म भाजपा  के करारी हार के बाद नेता मन म  आपसी मतभेद खुलके आघू आय लगे हे। ताजा मामला भाजपा के राष्ट्रीय महामंत्री  अउ छत्तीसगढ़  ले राज्यसभा सांसद सरोज पांडेय ले जुड़े हे। सांसद पांडेय सोमवार के बिलासपुर प्रवास म पहुंचिन। बिलासपुर म मीडिया ले चरचा म सरोज पांडेय  ह कहिन के कांग्रेस के घोसना पत्र के वजह ले विधानसभा चुनाव म भाजपा ल हार के सामना करना पड़िस हे।

सरोज पांडेय ह कहिन के आगामी लोकसभा चुनाव म छत्तीसगढ़ भाजपा पूर्व मुख्यमंत्री डॉ. रमन सिंह के चेहरा म चुनाव नइ लड़ही।  प्रदेश अध्यक्ष के नेतृत्व म चुनाव लड़े जाही। पूर्व मुख्यमंत्री डॉ. रमन सिंह द्वारा बंगला खाली करे म देरी  करे म सरोज पांडेय  ह कहिन के  राजनीतिक दल मन ल मर्यादा रहना चाही।  अयोध्या म राम मंदिर निरमान म सांसद सरोज   ह कहिन के जब राम जी चाही मंदिर बन जाही।

सरोज पांडेय के ए बयान के बाद ले सियासी गलियार मन म चरचा के दउर सुरू होगे हे।  कांग्रेस ह सरोज पांडेय के ए बयान  म निसाना साधिस हे। कांग्रेस प्रवक्ता आरपी सिंह  ह कहिन के लगत के कुछु ही महीना म  डॉ. रमन सिंह के चेहरा धूमिल हो जाही। एखर सेती  भाजपा उंखर चेहरा म चुनाव नइ लड़ना चाहत हे। उहें दूसर कोती भाजपा प्रवक्ता संजय श्रीवास्तव के कहिना हे के पार्टी म गुटबाजी जइसी कोनो बात नइए।