जिला पंचायत अध्यक्ष के चुनाव म रायपुर, दुर्ग, अंबिकापुर अऊ बिलासपुर म कांग्रेस प्रत्याशी मन ह लहराइस जीत के परचम

जय जोहार रायपुर… जिला पंचायत अध्यक्ष के चुनाव म रायपुर, दुर्ग, अंबिकापुर अऊ बिलासपुर म कांग्रेस प्रत्याशी मन ह जीत के परचम लहराइस हे। उहें राजनांदगांव अऊ कवर्धा म भाजपा के प्रत्याशी मन ह जीत हासिल करिस।
रायपुर जिला पंचायत पद के चुनाव म कांग्रेस प्रत्याशी डोमेश्वरी वर्मा ह जीत गिस। 16 सदस्य मन के जिला पंचायत म डोमेश्वरी ल 12 मत मिलिस। वहीं भाजपा के ललिता वर्मा ल महज 4 वोट ह मिलिस हे। वइसने दुर्ग जिला पंचायत अध्यक्ष के चुनाव म कांग्रेस के शालिनी यादव ह भाजपा के माया बेलचंदन ल हरा दिस हे। शालिनी यादव ल सात अऊ माया बेलचंदन ल पांच वोट मिलिस।

अंबिकापुर म कांग्रेस के मधु सिंह
अंबिकापुर जिला पंचायत अध्यक्ष पद के चुनाव म कांग्रेस के मधु सिंह ह जीत हासिल करिस। ओला 11 मत मिलिस। तो दूसर ओर भाजपा के बिमला सिंह ल महज तीन मत पड़िस। 14 सदस्य मन के ए जिला पंचायत म कांग्रेस के 11 अऊ भाजपा के तीन सदस्य हे। अइसने बिलासपुर जिला पंचायत अध्यक्ष के चुनाव म कांग्रेस प्रत्याशी ह चुनाव जीत गे हे। 22 सदस्य मन के जिला पंचायत म 17 सदस्य मन के साथ कांग्रेस के अरुण सिंह ल मिलिस। वो हा भाजपा के नूरी दिलेंद्र कौशील ल पराजित करिस।

राजनांदगांव म भाजपा के गीता
क्रांस वोटिंग ह राजनांदगांव जिला पंचायत अध्यक्ष के चुनाव म कांग्रेस के मंसूबा म पानी फेर दिस। कांग्रेस के क्रास वोटिंग के चलत राजनांदगांव जिला पंचायत म भाजपा के अध्यक्ष निर्वाचित होइस। भाजपा के गीता साहू ल 14 वोट मिलिस। ए पंचायत म भाजपा के सदस्य मन के संख्या ह 12 हे। एमा कांग्रेस के एक सदस्य ह क्रास वोटिंग कर अपन पार्टी के गणित ल बिगाड़ दिस। 24 सदस्य मन के जिला पंचायत म भाजपा के 12, कांग्रेस के 11 अऊ एक निर्दलीय सदस्य निर्वाचित होए रहिस। उहें कवर्धा म घलो भाजपा के रामकुमारी भट्ट ल जिला पंचायत अध्यक्ष चुने गिस हे। ओखर निर्वाचन निर्विरोध संपन्न होइस।