Congress सांसद मन ह प्रधानमंत्री ल लिखे हे पत्र, करिन ये आग्रह
जय जोहार…. छत्तीसगढ़ के चार कांग्रेस (congress) सांसद ह प्रधानमंत्री नरेंद्र मोदी ल पत्र लिखे हे। एमा केन्द्र सरकार के तरफ ले सुरू करे गे गरीब कल्याण रोजगार योजना म छ्त्तीसगढ़ ल शामिल करे के मांग करे हे।
कांग्रेस (congress) के कोरबा लोकसभा सांसद ज्योत्सना चरणदास महंत, बस्तर सांसद दीपक बैज, राज्यसभा सांसद छाया वर्मा अउ सांसद फूलोदेवी नेताम ह पत्र म लिखे हे कि डॉ रमन सिंह 15 साल छत्तीसगढ़ के मुख्यमंत्री रहिस, एखर शासनकाल म भ्रष्टाचार, कमीशनखोरी, कुशासन अउ जनविरोधी नीति के सती छत्तीसगढ़ गरीबी रेखा के मामला म देश म नम्बर वन बन गिस।
अब प्रदेश के भाजपा नेता मन के तरफ ले छत्तीसगढ़ ल गरीब कल्याण रोजगार योजना ले घलो वंचित करे के षड्यंत्र रचे जावत हे।
एनएसएसओ के आंकड़ा के आधार म छत्तीसगढ़ म गरीबी रेखा ले नीचे जीवनयापन करइया के संख्या ह 47.9 प्रतिशत हे। ये पूरा देश म सबले जियादा हे।
राष्ट्रीय औसत शहरी क्षेत्र बर 13.7 प्रतिशत अउ ग्रामीण क्षेत्र बर 25.7 प्रतिशत हे।
गरीब कल्याण रोजगार योजना म शामिल करे गे राज्य उड़ीसा (45.9 प्रतिशत), मध्य प्रदेश (44.3 प्रतिशत), झारखंड (42.4 प्रतिशत) अउ बिहार (41.3 प्रतिशत) के गरीबी रेखा के मामले म नम्बर क्रमशः 2, 3, 4 अउ 5 हे।
राजस्थान ल घलो शामिल करे गे हे, जिहां गरीबी रेखा के आंकड़ा ह छत्तीसगढ़ ले आधा ले घलो कम 21.7 प्रतिशत हे, लेकिन सबले जियादा गरीबी रेखा प्रतिशत वाले राज्य छ्त्तीसगढ़ ल दुर्भावनावश छोड़ दे गे हे।
कांग्रेस (congress) के सांसद मन ह तत्काल ए योजना म शामिल कर छत्तीसगढ़ वापस लहुटे लगभग 5 लाख श्रमिक मन ल एखर लाभ दे के मांग प्रधानमंत्री ले करे हे।
