जय जोहार…. भाजपा नेता अजय चंद्राकर के बयान म कांग्रेस ह पलटवार करे हे। प्रदेश कांग्रेस संचार विभाग के अध्यक्ष शैलेश नितिन त्रिवेदी ह कहिन कि भाजपा नेता अजय चंद्राकर ल आज ए बात के तकलीफ हे कि भूपेश सरकार ह काबर गाय अउ गोबर ल सम्मान दे के बात करत हे।
ए बात ल नई भुलाय जा सकथे कि परम्परा अउ संस्कृति के बात करइया अजय चंद्राकर ह अटल बिहारी वाजपेयी के श्रद्धांजलि सभा म ठहाके लगात दिखाई दे रिहिस।
वो हा कहिन कि ये सच हे कि भारतीय जनता पार्टी ह गौरक्षा के नाम म प्रदेशभर म गौशाला बनवाइस अउ 15 साल के रमन सिंह सरकार म करोड़ों रूपिया के अनुदान ह भाजपा नेता मन के गौशाला ल सरकार के ओर ले मिलत रिहिस।
लेकिन अंतत: भाजपा के नेता ह गौसेवा करइया नई, गौमाता ल मार के चमड़ा, हड्डी अउ मांस के व्यापार करइया निकलिस। अइसे पार्टी के नेता अजय चंद्रकार ह आज अगर प्रदेश के राजकीय चिन्ह के अपमान करइया ट्वीट करत हे।
यदि ओ मन ल गोबर ले गंध आवत हे, त ये ओखर अउ ओखर पार्टी भाजपा के नीति अउ नीयत के मामला हे।
