धान खरीदी केन्द्र मन म टोकन नइ काटे ले विवाद

 महासमुंद । धान खरीदी केन्द्र मन म टोकन नइ काटे के  निरदेस ल लेके विवाद होना सुरू हो गिस हे।  बागबाहरा ब्लॉक के खल्लारी सोसायटी म बीते सोमवार के करीब 30 ले 35 किसान मन ल टोकन नइ काटे के बात ल लेके  जमके हंगामा होइस । किसान मन ह प्रसासन उपर मुख्यमंत्री के आदेस के पालन नइ करे के आरोप लगाइस।  प्रसासन जिला के सबो किसान मन के सतप्रतिसत पंजीयन कराके धान के टोकन पहिली ले  काट ले के बात कत हवय।

बता दन के ए बरिस साल धान बेचे बर जिला के 1 लाख 17 हजार 513 किसान मन ह अपन पंजीयन कराइल हे। जेमा खल्लारी सोसायटी के 1306 किसान सामिल हे।  खल्लारी म 13 गांव के किसान अपन धान बेचथे।  वर्तमान स्थिति के बात करव त 1207 किसान मन ह अपन धान ए बछर अभु तक बेचे हे, लेकिन सरकार के आदेस अउ  समर्थन मूल्य म बढ़ोत्तरी ल देखत हुए ए बरिस किसान अपन पूरा धान बेचना चाहत हे। इही बात ल लेके मंगलवार के खल्लारी क्षेत्र के कुछु किसान सोसायटी पहुंचे रहिन हे। अउ धान बेच बर टोकन कटवाना चाहत रहिन हे।

एमा 7 किसान नवां अउ बाकि किसान दुबारा धान बेचइया रहिन हे, लेकिन प्रबंधन ह अनुविभागीय अधिकारी के आदेस के बाद टोकन काटे के बात कहिस।  जेखर बाद किसान खरीदी केंद्र म हंगामा करे लगिस।  किसान मन के हंगामा के बाद बागबाहरा एसडीएम ह किसान मन के पंजीयन के जांच के बाद टोकन काटे के आदेस दिस हे।  धान खरीदी बर  महज 3 दिन बचे हवय।