Balodabazar: अस्पताल म कोरोना संक्रमित छह माह के लईका के हो गे मौत, परिवार के छह सदस्य घलो हे कोरोना पाजिटिव
जय जोहार…. बलौदाबाजार (balodabazar) जिला के कोविड अस्पताल म कोरोना संक्रमित छह माह के लईका के मौत हो गे। एखर पुष्टि ल सीएमएचओ ह करे हे।
जानकारी के मुताबिक लईका के माता-पिता समेत परिवार के सात लोगन मन ह कोरोना पाजिटिव निकले रिहिस।
रिपोर्ट आय के बाद सबो ल पांच अगस्त के कोविड अस्पताल म भर्ती कराय गे रिहिस, जिहां इलाज के दौरान लईका के मौत हो गिस।
(balodabazar) सीएमएचओ डॉ के आर सोनवानी ह बताइस कि लईका ल तीन दिन पहिले कोविड अस्पताल लाय गे रिहिस।
लईका के माता-पिता समेत सात लोगन मन ह कोरोना संक्रमित रिहिस। गुरुवार देर रात अचानक तबीयत खराब होय ले लईका के मौत हो गे हे।
लईका ह कोरोना पाजिटिव रिहिस। एखर सती लईका के पोस्टमार्टम नई करे जाही। प्रोटोकाल के तहत लईका के शव ल परिजन मन ल सौंपे जाही।
बता देन कि (balodabazar) जिला म कोरोना संक्रमित मरीज मन के संख्या ह बाढ़ के 434 हो गे हे। जेमा ले एक्टिव मामला 72 हे।
उहचे 361 मरीज मन ह बने होय के बाद अपन घर लहुट चुके हे। ए वायरस ले जिला म अब तक दू मरीज के मौत हो गे हे।