जय जोहार…. छत्तीसगढ़ म कोरोना (corona) संक्रमण के मरीज मन के संख्या म सरलघा इजाफा होवत जावत हे। गुरुवार के बीजापुर जिला म घलो कोरोना ह दस्तक दे दे हे। इहां सीआरपीएफ के अधिकारी ह कोरोना संक्रमित पाय गे हे। कलेक्टर रितेश अग्रवाल ह एखर पुष्टि ल करे हे।
मिले जानकारी के अनुसार ये बीजापुर जिला के पहला कोरोना (corona) मामला हे। सीआरपीएफ बटालियन के एक अधिकारी ह गत दिन घर ले छुट्टी मना के वापस कैम्प लहुटे रिहिस। ओला एहतियातन क्वारेंटाइन करे गे रिहिस अऊ ओखर सैम्पल ल जांच बर भेजे गे रिहिस।
आज अधिकारी के रिपोर्ट ह कोरोना पाजिटिव आय हे। ओखर सम्पर्क म आय सब्बो लोगन मन के आरटीपीसीआर किट ले सैम्पल ले ले गे हे।
बता देन कि प्रदेश म कोरोना (corona) ले संक्रमित मरीज मन के संख्या ह 2419 हो गे हे। जेमा ले 1601 मरीज मन ह कोरोना ल मात दे दे हे अऊ अपन घर लहुट चुके हे। जबकि सक्रिय मरीज मन के संख्या ह 806 हे। ए वायरस ले अब तक 12 लोगन मन के जान चले गे हे।
