Corona: धमतरी म फेर कोरोना ह दे हे दस्तक, स्वास्थ्य विभाग के कर्मचारी ह कोरोना पाजिटिव
जय जोहार…. कुछ दिन पहिले ही धमतरी जिला ह कोरोना (corona) ले मुक्ति होय रिहिस, लेकिन सोमवार के जिला म फेर कोरोना ह दस्तक दे दे हे। शहर के बांसपारा वार्ड म कोरोना (corona) संक्रमित एक नवा मरीज मिले हे। आज ओखर रिपोर्ट ह कोरोना पाजिटिव आय के बाद स्वास्थ्य विभाग अउ पुलिस के टीम ह मरीज के घर समेत पूरा वार्ड ल सील कर दे हे।
मुख्य चिकित्सा अउ स्वास्थ्य अधिकारी डॉ डीके तुर्रे ह बताइस कि संक्रमित मरीज ह गरियाबन्द स्वास्थ्य विभाग के टीबी यूनिट म पदस्थ हे। 26 जून के ओखर ब्लड सैम्पल जांच बर रायपुर एम्स भेजे गे रिहिस। ओखर रिपोर्ट ह आज आ गे हे, जेन कोरोना (corona) पाजिटिव निकले हे। मरीज ल रायपुर एम्स भेजे के तैयारी ल स्वास्थ्य विभाग ह करत हे। संगेसंग मरीज के संपर्क म आय लोगन मन के पहचान करे जावत हे।