जय जोहार…. राजधानी म आज फेर एक कोरोना संक्रमित मरीज मिले हे। बतावत जात हे कि पीड़ित ह कपड़ा व्यापारी हे अऊ रायगढ़ बाड़ा म रहिथे। ओला खांसी अऊ बुखार रहिस। जांच म ओखर रिपोर्ट ह पाजिटिव आय हे। बता देन कि ओखर कोनो ट्रैवल हिस्ट्री नई मिले हे। ऊहचे रिपोर्ट के बाद स्वास्थ्य विभाग ह सिविल लाइन स्थित रायगढ़ बाड़ा ल सील कर दे हे।
एति राजधानी ले राहत भरे खबर सामने आय हे। आज 11 मरीज ल स्वस्थ होय के बाद अस्पताल ले डिस्चार्ज कर दे गे हे। जानकारी के मुताबिक अभनपुर अऊ तिल्दा ले 3-3, बिरगांव ले 2 अऊ रायपुर शहर ले 3 मरीज ह स्वस्थ हो गे हे।
ए मरीज मन के माना कोविड, मेकाहारा कोविड अस्पताल म इलाज चलत रहिस। स्वस्थ होय के बाद सब्बो ल डिस्चार्ज करे गे हे। स्वास्थ्य विभाग ह एखर पुष्टि ल करे हे। अब तक राजधानी म 72 लोगन मन ह कोरोना ले जंग जीत चुके हे। ऊहचे राजधानी म अभी 75 एक्टिव केस हे। रायपुर जिला म अब तक कोरोना के 147 मरीज मिले हे।
