तिल्दा म मिलिस कोरोना के पहला मरीज, महाराष्ट्र ले लहुटे रहिस संक्रमित

जय जोहार…. तिल्दा म कोरोना के पहला संक्रमित के पहचान होय हे। पाजिटिव मरीज ह महाराष्ट्र के पंढरपुर ले 31 मई के लहुटे रहिस। जेखर बाद ओला सुंगेरा गांव म क्वारेंटाइन करे गे रहिस। ए दौरान मरीज के स्वाब सैम्पल ल जांच बर भेजे गे रहिस। जेन ह जांच म पाजिटिव पाय गिस। तिल्दा बीएमओ डॉ. आशीष सिन्हा ह एखर पुष्टि करे हे।

गौरतलब हे कि छत्तीसगढ़ म कोरोना मरीज मन के संख्या ह दिन ब दिन बाढ़त जावत हे। हर रोज कोरोना के दर्जनों मरीज ह सामने आवत हे। बीती रात कोरोना के कुल 52 नवा मरीज के पहचान होय हे। कुल सक्रिय मरीज मन के संख्या ह 489 हो गे हे।

देश म पिछिले 24 घंटा म अब तक के सबले जियादा 9304 मामले सामने आये हे। जबकि 260 लोगन मन के मौत हो गे हे। अब तक देश म कुल कोरोना संक्रमित मन के संख्या ह 2 लाख 16 हजार ले जियादा हो गे हे।