चारों मुड़ा मांत गे हे छत्तीसगढ़िया ओलंपिक के “दंगल”

हमर माटी के खेल खेले बर लोगन मन के जबर उत्साह

का लईका… का सियान… जम्मो झन लेवत हे बढ़ चढ़ के हिस्सा

हमर माटी के खेल ल पहिचान दिलाए खातिर राज्य सरकार ह छत्तीसगढ़िया ओलंपिक के सुरुआत करे हे जेखर जबर उत्साह लोगन मन म देखे बर मिलत हे। का लईका.. का सियान.. का नोनी… का बाबू… जम्मो ह ए खेल म बढ़ चढ़ के हिस्सा लेवत हे। छत्तीसगढ़ के चारों मुड़ा म खेल के माहोल मात गे हे। बता देन कि राज्य सरकार गांव, नगर अऊ कस्बा म छत्तीसगढ़िया ओलंपिक के आयोजन करत हे। जेमा हर वर्ग के लोगन मन एमा अपन भागीदारी देवत हे।

छत्तीसगढ़ म भूपेश सरकार ह छत्तीसगढ़ी परंपरा, विरासत अऊ संस्कृति के संरक्छन अऊ संवर्धन करत हे उहें हमर पुरखौती के विरासत ल सहेजे में लगे हे। अईसनहा हमर राज के पारंपरिक खेल कंचा, भंवरा, कबड्डी, खो-खो, लंगडी दौड़, 100 मीटर दौड़, कुर्सी दौड़, पिट्ठुल, गेड़ी दौड़, बिल्लस फुगड़ी, गिल्ली डंडा, लंबी कूद जईसन पुरखौती के खेल मन ल बचाए के काम करत हे।

खेल कोती लोगन मन के धियान देवाय बर राज्य सरकार ह छत्तीसगढ़िया ओलंपिक के आयोजन करत हे। ए पारंपरिक खेल स्पर्धा म लोगन मन बड़ उत्साह ले हिस्सा लेवत हे। खेलईया खिलाड़ी मन के हौसला तब अऊ बाढ़त हे जब एला देखे बर लोगन मन के भीड़ ह आवत हे। एक कोती खेल मैदान म जिहां सियान मनखे मन घलो खेल के करतब देखावय हे उहें लईका अऊ जवान मनखे मन के अलग-अलग खेल स्पर्धा के आयोजन घलो होवत हे। सियान मन कई बछर बाद खेल ल खेल के अपन नानकून पन ल याद करत हे। बता देन कि ए आयोजन ह 6 चरण म आयोजित होना हे। अभी के बेरा तक दू चरण म स्पर्धा के आयोजन हो गे हे। राजीव युवा मितान क्लब अऊ जोन स्तर म ए खेल प्रतिस्पर्धा के आयोजन बर अलग-अलग विकासखंड अऊ नगरीय क्लस्टर स्तर म समिति के गठन करे गे हे जेखर जिम्मा म खेल के आयोजन होवत हे।

चूल्हा चौका ले निकालत हे बेरा

गांव म जिहां माई लोगन मन घरेलू काम बूता म व्यस्त रहिथे उहें ए खेल म छ्त्तीसगढ़ सरकार के सुघ्घर सोच म अपन भागीदारी देवत हे। संगे-संग मैदान म घलो जोर दिखावत हे। एक दू खेल नई बल्कि माई लोगन मन कई खेल म हिस्सा लेवत हे जेन ह ए आयोजन के सार्थकता ल बतावत हे।

कतेक मिलही पुरस्कार

राज्य स्तरीय प्रतियोगिता म हर उमर के लोगन मन ल एकल अऊ दलीय प्रतिस्पर्धा बर अलग-अलग पुरस्कार राखे गे हे। दलीय खेल म पहला पुरस्कार 10 हजार रुपिया अऊ द्वितीय पुरस्कार 7 हजार 500 रुपिया तय करे गे हे। उहें तृतीय पुरस्कार 5 हजार रुपिया दे जाहि। अईसने एकल खेल म प्रथम पुरस्कार 1 हजार रुपिया अऊ द्वितीय पुरस्कार 750 रुपिया मिलही त तृतीय पुरस्कार 500 रुपिया तय करे गे हे।