जय जोहार. फेसबुक ह पहिली बार ओ मनखे मन के नाव ल सार्वजनिक करे बर राजी हो गे हे जेन मन ह फेसबुक के प्लेटफार्म म नफरत फैलईया बयान दे के माहोल ल बिगाड़े के काम करथे। कंपनी ह ओखर मन के नाव ल सामने लाए म सहमत हो गे हे जेन म ऑनलाईन अफवाह घलो फैलाथे। अमेरिका अऊ फ्रांस के सरकार म एख समझौता होए हे जेखर हिसाब ले फेसबुक डेटा ल दे बर बाध्य नई हे।
फ्रांस के डिजिटल अफेयर्स मंत्री केडरिक ओ ह कहिन कि राष्ट्रपति इमैनुअल मैक्रों अऊ फेसबुक के सह संस्थापक मार्क जकरबर्ग के बीच होए बईठक के बाद ऐ फईसला ले गिस। केडरिक ह कहिन कि ऐ ह एक बड़का खबर हे काबर कि एखर ले फ्रांस के कानून बेवस्था ल मदद मिलही। फ्रांस के कोर्ट ह आतंक अऊ घृणा फैलईया मन के खिलाफ कई मामला ले सुनवाई करत हे। अदालत ह सोशल मीडिया कंपनी ले अईसे लोगन मन के डेटा मांगे रिहिस। जेन मन ह ऐ प्लेटफार्म के दुरुपयोग करके माहोल ल बिगाड़े के काम करथे।
लॉ फर्म लिंकलेटर्स के एडवोकेट सोनिया सिसे के कहिना हे कि ऐ रेगुलेशन के मामला म ऐ बड़का फैसला ए। ओखर कहिना हे कि भड़काऊ बयान अभिव्यक्ति के स्वतंत्रता नोहे बल्कि ए ह आतंकवाद जईसने एक गंभीर अपराध हे। अब दूसर सोशल मीडिया कंपनी मन ल घलो अईसने डेटा देना पड़ही नई ते ओखर मन के खिलाफ केस दायर होही।
फ्रांस ह अब्बड़ बेरा ले सोशल मीडिया कंपनी ल रेगुलेट करे के वकालत करत आत हे। उहां के संसद ह अईसे कानून बर घलो बिचार करत हे जेमा नियम मन के अवहेलना बर सोशल मीडिया कंपनी उपर ओखर कुल वैश्विक आय के 4 प्रतिशत जुर्माना लगाए जा सके।
Other Articles
