Admission: राज्य सरकार ह कालेज मन के एडमिशन के तारिख ल बढाईस, पढो पूरा खबर

जय जोहार…. छत्तीसगढ़ के कॉलेज म एडमिशन (Admission) के आखिरी तिथि ल बढ़ा दे गे हे। ए संबंध म उच्च शिक्षा विभाग ह राज्य के सबो कुलसचिव अऊ सबो कालेज के प्राचार्य मन ल पत्र जारी कर दे हे।
एखर पहिले राज्य सरकार ह कालेज म दाखिला (Admission) बर 31 अगस्त के तिथि रखे रहिस, जेला अब 23 सितंबर तक बर बढ़ा दे गे हे। उच्च शिक्षा विभाग के अपर संचालक तरफ ले जारी आदेश म केहे गे हे कि शैक्षणिक संस्था बर सत्र 2020-21 म प्रवेश के तारीख एक अगस्त ले 31 अगस्त तक प्राचार्य स्वयं अऊ 15 सितंबर तक कुलपति के इजाजत ले तय करे गे रहिस,
लेकिन अब एडमिशन के तारीख ल बढ़ा दे गे हे। नवा आदेश के अनुसार 23 सितंबर तक प्राचार्य अऊ 30 सितम्बर तक कुलपति के अनुमति ले प्राचार्य एडमिशन (Admission) कर सकही।