आबकारी विभाग के पंखा म लटकत रिहिस लाश, अवैध शराब व्यवसाय के आरोपी म लाए गे रिहिस युवक ल

कवर्धा. अवैध शराब के व्यवसाय म लिप्त होए के आरोप म मंगलवार के दिन एक झन युवक ल गिरफ्तार करे गे रिहिस। एखर बर ओ युवक के लाश मुंधरहा आबकारी विभाग के कंट्रोल रूम म पंखा म लटके हुए पाए गिस। प्राथमिक जांच म मामला ल आत्महत्या करार दे जात हे। उहें आबकारी विभाग के उप निरीक्षक अऊ दू सिपाही मन ल निलंबित कर दे गे हे।

मृतक के नाव हरिशचंद्र मरावी रिहिस। ओखर मौत के बाद नेता प्रतिपक्ष धरमलाल कौशिक ह जम्मो घटना के न्यायिक जांच अऊ पीडित परिवार ल उचित मुआवजा दे के मांग करे हे। उहें आदिवासी समुदाय ले जुड़े लोगन अऊ भाजपा युवा मोर्चा के कार्यकर्ता मन एखर खिलाफ प्रदर्शन करिन।

बढ़त दबाव ल देखत मामला म सरकार डाहर ले आबकारी विभाग के उप निरीक्षक लीना सिंह, सिपाही मनोज ओगरे अऊ लोकेश नेताम ल निलंबित करे गे हे। हरिशचंद्र के पिता ह ओखर बेटा ल छोड़े के एवज म पईसा के मांग अऊ पईसा नई दे के एवज म मारपीट करे के आरोप लगात हे। परिजन मन के यहू दावा हे कि मामला म कुछ पईसा घलो दे गे रिहिन फेर हरिशचंद्र ल नई छोड़े गिस।

मृतक बैगा आदिवासी समुदाय के बताए जात हे। ए आदिवासी मन के विशेष संरक्षित समुदाय होथे जेखर संरक्षण अऊ विकास बर देश के राष्ट्रपति ह गोद ले हे।