कांग्रेस सरकार ह कर दिस.. ए किसान ल निसफिकर

करजा माफ होए म जताइस नवा सरकार के आभार

कोरबा : सहर ले करीबन 70 किलोमीटर दूर पहाड़ अऊ जंगल मन ले सटे एक छोटकुन गांव हे बरेलियापारा। कच्चा सड़क वाले ए गांव म असमेर सिंह जइसे किसान घलोक रहिथे। जेखर पास खेत तो 52 एकड़ के हे। फेर करजा के बोझ म दबे ले अऊ फसल नइ होए ले ओखर माली हालत भूमिहीन किसान के जइसे हो गए रहिस।

ये गांव म जाए ले अपन पुश्तैनी माटी के घर के परछी म असमेर सिंह निसफिकर बइठे मिलिस। पाछू महीना जब हम आए रहेन त ओकर चेहरा म चिंता अऊ तनाव के लकीर रहिस। करीबन साढ़े चार साल पहिली वो ह खेती करे बर लाख रूपिया के करजा ए भरोसा ले ले रहिस के फसल अच्छा होही त करजा चुकाये के संग अपन कई संउख घलोक पूरा कर लेही।

वो ह खाद, बीज खरीदिस, फसल घलोक बोंइस। फसल बोए के बाद, न सिरिफ किसान असमेर सिंह ओखर दो भाई,चार बेटा अऊ 10 भतीजा मन संग उंखर पत्नि मन अउ घर के आन सबो सदस्य मन के सपना रहिन के धान बेचके हाथ म कुछु न कुछु रूपिया जरूर आही।

कुछ इही भरोसा के संग ए सयुंक्त परिवार के हर सदस्य मन ह खेती किसानी के काम म मिलजुलके हाथ बंटावत रहिन। समय के संग अच्छा फसल के उम्मीद पाले किसान असमेर सिंह संग वोकर परिवार ल एक बड़ा झटका तब लगिस जब उहां बरसा नइ होइस।

फसल के नुकसान तो  होबे  करिस, जऊन करजा ले रहिस ओला घलव नइ चुका पाय के चिंता ह पूरा परिवार ल तनाव म रहिन। करजा के बोझ तले विषम परिस्थित म जीवन यापन करत किसान तीर कोनो अऊ उपाय नइ रहिस जऊन ओला करजा ले मुक्ति देवा सकय।

चिंता म डूबे ए कुटुंब बर नवां सरकार के किसान हितैषी कदम एक बड़का राहत ले के आइस। प्रदेस के आन किसान मन के जइसे कोरबा के ग्राम जटगा के किसान असमेर सिंह के सबले जादा सवा पांच लाख रूपिया के एक बड़का करजा मिनट म माफ हो गे।

ओ ह बताइस के नवा सरकार बने ले  प्रदेस के मुख्यमंत्री भूपेश बघेल ह किसान मन के समस्या मन ल महसूस करिन अऊ धान के समर्थन मूल्य 25 सौ रूपिया क्विंटल करे के संग म करजा माफ करके उंखर जइसे हिम्मत हार गे हजारों किसान मन ल एक नवा संजीवनी प्रदान करिस।

अब वो एक नवा उम्मीद के संग फसल बोही। अपन पांच लाख 23 हजार 660 रूपिया के करजा माफ करे म छत्तीसगढ़ सरकार के प्रति वो ह आभार घलोक जताइस हे।