भारत सरकार के गाइड लाईन के अनुसार ले जाही लॉकडाउन के संबंध म फैसला – भूपेश बघेल
जय जोहार रायपुर…. मुख्यमंत्री भूपेश बघेल की अध्यक्षता म आज मुख्यमंत्री निवास म मंत्री अऊ अधिकारी मन के बइठक आयोजित करे गिस। ए बइठक म मंत्रिपरिषद के सदस्य अऊ अधिकारी मन ह वीडियो कान्फ्रेंसिंग के माध्यम ले शामिल होइस। बइठक म कोरोना वायरस के संक्रमण ले रोकथाम बर लॉकडाउन बढ़ाए के मद्देनजर अलग-अलग विभाग मन के कार्य मन के समीक्षा करे गिस।
ए अवसर पर मुख्यमंत्री भूपेश बघेल ह कहिन कि लॉकडाउन के संबंध म सबो मंत्री मन ले महत्वपूर्ण सुझाव मिले हे। भारत सरकार के गाइड लाइन के बाद ए म निर्णय ले जाही। एखर बर पृथक ले आदेश जारी करे जाही अऊ ए आदेश के कड़ाई ले पालन करे ल होही। वोहा कहिन कि लॉकडाउन के दौरान कोविड 19 के संक्रमण ले बचाव अऊ रोकथाम के उपाय ल लागू करे म सबो मंत्री अऊ अधिकारी-कर्मचारी मन ह टीम भावना के संग सराहनीय कार्य करे हे।
मुख्यमंत्री बघेल ह बइठक म प्रदेश म कोरोना टेस्टिंग किट, मास्क, पीपीई किट, ग्लब्स, सेनेटाइजर, वेन्टिलेटर के उपलब्धता, आइसोलेशन वार्ड, क्वारेनटाइन सेंटर, ग्रामीण मन ल रोजगार उपलब्ध कराए बर आदि व्यवस्था मन के समीक्षा करिस अऊ आवश्यक निर्देश दिस।
