बेमेतरा। ट्रांसफार्मर ल बनाए बर खंभा म चढ़े एक झन बिजली कर्मचारी के करेंट लगे ले मउत हो गे। ये मामला म उंखर संग गे रिहिस एक झन अउ कर्मचारी के लपरवाही आघू आए हे।

जानकारी के मुताबिक बिजली बिभाग के कर्मचारी ह दू झन अउ कर्मचारी के संग ट्रांसफार्मर ल बनाए बर कुसमी फीडर गे रिहिन। इही दउरान एक झन कर्मचारी ल बिजली लाइन ल बंद करे बर भेजे रिहिस। फोन ले वो कर्मचारी ले बात घलो करिस और वो ह लाइन ल बंद कर देंव कहिके बताईस। तेखर बाद बिजलीकर्मी रामभरोसा शर्मा ह खंभा म चढ़िस अउ जईसे ही वो ह तार ल छुईस ताहन करेंट के चपेट म आ गे जेकर से उंखर मउत हो गे।

बतात हे कि लाइन ल बंद करे बर गे रिहिस कर्मचारी के लपरवाही के कारन ये हादसा होय हे। वो कर्मचारी ह जेन लाइन म काम करना रिहिस वोला बंद नई करके दूसर डाहर के लाइन ल बंद कर दे रिहिस।