छॉलीवुड बर कुछु नवा करे के चाह दिल म पाले हे बहुमुखी प्रतिभा के धनी नैनी तिवारी

जय जोहार. अलग-अलग तरह के प्रतिभा की धनी नैनी तिवारी ह न सिर्फ अभिनय कला म निपुण हे बल्कि एक कुशल एंकर, शिक्षिका, कवयित्री अऊ लेखिका घलो हे। छत्तीसगढ़ के मुगेंली जिला म पले बढ़े नंदिनी तिवारी (नैनी) ह अपन फिल्मी सफ़र के शुरूआत भोजपुरी एल्बम से करिस। ओखर पहिली छत्तीसगढ़ी फिलिम अंधियार हे, जेन ल एजा़ज वारसी ह निर्देशित करे हे। एखरे संगे संग दूसर फिलिम “मोंगरा“ ह सोहनलाल वर्मा के निर्देशन में बनत हे। ऐ फिलिम म नैनी के अभिनय कला ल अब्बड सराहना मिलत हे।

नैनी ह हिन्दी साहित्य म एमए के संग बीएड अऊ पीएचडी के उपाधि ले हे। ओहा साहित्य के क्षेत्र म अपन पहचान बना चुके हे। ओखर दो किताब गज़ल संग्रह गुमगश्ता अऊ कविता संग्रह गुफ़्तगू घलो प्रकाशित हो चुके हे। अपन लेखनी प्रतिभा ल लेके बिहार के भागलपुर म विक्रमशीला यूनिवर्सिटी ह नैनी ल विद्यावाचस्पति यानि कि साहित्य क्षेत्र म पीएचडी के उपाधि प्रदान करे हे। अब डॉ. नंदिनी तिवारी (नैनी) साहित्य के संगे संग छॉलीवुड फिल्म इंडस्ट्री ल भी रोशन करे के इच्छा रखथे।

साहित्य क्षेत्र के संग नैनी अभिनय के क्षेत्र म भी सराहनीय भूमिका निभावत हे। नैनी भोजपुरी के संग छत्तीसगढ़ी एल्बम म घलो काम कर चुके हे। ओखर छत्तीसगढ़ी एल्बम तोर सुरता जल्द रिलीज़ होवईया हे। नैनी अपन प्रतिभा ले छॉलीवुड इंड्रस्टी म कुछ नवा करे के चाहत रखथे। नैनी ह कहिथे कि ओखर जगह फिलिम के बहुत प्रस्ताव आथे लेकिन कहानी के गंभीरता अऊ सबो बात ल ध्यान म रखके वो ह आगे विचार करथे।