रायपुर। मुख्यमंत्री विष्णुदेव साय आज इहां राजधानी रायपुर के कोटा रोड स्थित स्वामी विवेकानंद एथेलेटिक स्टेडियम म आयोजित 45वां एनटीपीसी जूनियर राष्ट्रीय तीरंदाजी प्रतियोगिता के शुभारंभ करिन। ओमन ह 45वां एनटीपीसी जूनियर राष्ट्रीय तीरंदाजी प्रतियोगिता के सफल आयोजन बर अपन शुभकामना दिन अउ खिलाड़ी मन ल उत्कृष्ठ प्रदर्शन बर उखर उत्साहवर्धन करिन।
मुख्यमंत्री साय ह कहिन कि छत्तीसगढ़ के ए सौभाग्य हे कि प्रदेश ल राष्ट्रीय ट्राइबल गेम्स के आयोजन के अवसर मिलिस हे। प्रधानमंत्री नरेंद्र मोदी के नेतृत्व म खेलो इंडिया के माध्यम ले देश के खेल प्रतिभा ल आगु बढ़े के बहुत अच्छा अवसर मिलत हे। संग म आज पूरा देश अउ प्रदेश म खेल ल लेके बेहतर वातारण तैयार होत हे। ओमन ह कहिन कि छत्तीसगढ़ म खेल के विकास हमर प्राथमिकता म शामिल हे। सरकार द्वारा जम्मों खेल के खिलाड़ी मन ल अपन प्रतिभा ल निखारे जम्मों सुविधा अउ प्रोत्साहन देय जात हे।
मुख्यमंत्री साय ह कहिन कि छत्तीसगढ़ प्रदेश म घलो खेलो इंडिया के नया परिसर के शुरुआत करे गिस हे, एखर ले खेल प्रतिभा ल जम्मों जरुरी सुविधा मिलत हे। राज्य म खेल अलंकरण समारोह के आयोजन करे जात हे जेखर ले खिलाड़ी मन ल विशेष प्रोत्साहन देय जात हे। हमर सरकार ओलंपिक म शामिल होवइया एथलीट ल 21 लाख रुपया दिही। यदि हमर प्रदेश के कोई युवा खिलाड़ी ओलंपिक म स्वर्ण पदक जीतत हे त ओला 3 करोड़, रजत पदक जीते म 2 करोड़ अउ कांस्य पदक जीतइया मन ल एक करोड़ रुपया प्रोत्साहन राशि दे जाहि।
उल्लेखनीय हे कि 45वां एनटीपीसी जूनियर राष्ट्रीय तीरंदाजी प्रतियोगिता के आयोजन छत्तीसगढ़ प्रदेश आरचरी एसोसिएशन अउ छत्तीसगढ़ खेल अउ युवा कल्याण विभाग के तत्वावधान म करे जात हे। ए प्रतियोगिता 22 ले 30 दिसंबर तक आयोजित होहि। प्रतियोगिता म 30 राज्य अउ केंद्र शासित प्रदेश ले लगभग 500 खिलाड़ी हिस्सा लेत हे।
