सोलर पैनल अपनाके देवश्री साहू बनिस आत्मनिर्भर, बिजली बिल ले मिलिस पूरा छुटकारा
रायपुर. पीएम सूर्यघर मुफत बिजली योजना ले न सिरिफ़ बिजली बिल ले राहत मिलत हे, बल्कि पर्यावरण ला बचाए मा घलो मदद मिलत हे। सोलर पैनल लगाके मनखे मन अब आत्मनिर्भर बनत हें। बलौदाबाजार के शिक्षिका देवश्री साहू ह घलो ये योजना के तहत अपन घर के छत मा सोलर पैनल लगवाईस, जेखर ले अब ओला मुफत बिजली के लाभ मिलत हे।
ग्राम खैरघटा के रहइया अऊ पेसा ले शिक्षिका देवश्री साहू ह बताइन कि सोलर पैनल लगाए के प्रेरणा ओला अपन भाई के घर ले मिलिस, जहाँ ओ मन पहिली बार ये तकनीक ला देखिन अऊ एखर फायदा के बारे मा समझिन। सरकार के ये लोक-कल्याणकारी योजना ले प्रभावित होके ओ मन जून 2025 मा अपन घर के छत मा 3 किलोवाट के सोलर पैनल लगवा लीन।
सोलर पैनल लगे के बाद देवश्री के घर के बिजली व्यवस्था मा बड़े बदलाव आइस हे। ओ मन खुसी जतावत कहिन कि पहिली जे बिजली बिल ला भरे के चिंता रहय, ओ ह अब लगभग ‘जीरो’ (शून्य) हो गे हवय। संग मा एला लगाए बर केन्द्र अऊ राज्य सरकार कोति ले सब्सिडी (छूट) घलो मिलिस हे। एक शिक्षिका होय के नाते ओ मन समाज मा जागरूकता के मतलब ला समझथें, अऊ अब ओ मन अपन अड़ोस-पड़ोस के मनखे मन ला घलो सौर ऊर्जा अपनाए बर समझावत हें। आज ओ ह इलाका के दूसर महिला मन बर प्रेरणा बन गे हवय।
देवश्री ह ये आर्थिक बचत अऊ सुविधा बर प्रधानमंत्री नरेन्द्र मोदी अऊ प्रदेश के मुख्यमंत्री विष्णुदेव साय के हिरदे ले आभार जताइन। ओखर मानना हे कि ये योजना ह न सिरिफ़ पर्यावरण बर बढ़िया हे, बल्कि आम मनखे मन के जिनगी ला ऊपर उठाए अऊ ओ मन ला बिजली के खरचा ले मुकत करे बर एक बड़े कदम आय।
मुख्यमंत्री विष्णुदेव साय के अगुवाई मा छत्तीसगढ़ मा ‘पीएम सूर्यघर मुफत बिजली योजना’ के काम जउन तेजी ले होवत हे, ओखर सीधा फायदा देवश्री जइसन मध्यमवर्गीय परिवार मन ला मिलत हे।
