धमतरी जिला के जम्मो तहसील ह इलाका सूखाग्रस्त घोसित

धमतरी। बने बारिस नइ होए ले धमतरी जिला के जम्मो तहसील ल सरकार ह सूखाग्रस्त इलाका घोसित करिस हे। सर्वे बर दिल्ली के टीम ह धमतरी के दउरा करिस, अऊ ये मानिस कि जिला म सबले जादा सूखा ले प्रभावित मगरलोड अऊ नगरी क्षेत्र है। फेर आज तक घलो मगरलोड इलाका के मोहंदी गांव के तकरीबन 250 ले जादा किसान मन ल फसल बीमा के लाभ नइ मिल पाए हे। स्थिति अइसे हे कि बेलोरा जलाशय होए के बाद घलो ओमन ल खेत बर पानी नइ मिले हे। जेकर ले उंकर फसल नस्ट हो गिस हे। अइसे म किसान मन ल फसल बीमा ले फसल भरपाई के उम्मीद रहिस, फेर किसान मन ल सिंचित एरिया होए के सेती ले ओ घलो नइ मिले हे। उहें किसान अपन फसल के बीमा पहिली ही करा चुके रहिन, अऊ अब फसल बीमा नइ मिले ले किसान मन अपन आप ल ठगे हुए महसूस करत हे। बहरहाल ये मामला म प्रसासन अब जांच के बात कहत हे।