बेमेतरा जिला अस्पताल के डायलिसिस यूनिट बनीस किडनी मरीज मन के सहारा

300 मरीज मन ला मिलिस फायदा, 7,000 ले जादा डायलिसिस सेशन होइस पूरा

रायपुर. जिला अस्पताल बेमेतरा में सुरु करे गे आधुनिक डायलिसिस यूनिट किडनी के मरीज मन बर असीरवाद साबित होवत हे। स्वास्थ्य विभाग कोति ले मातृ एवं शिशु अस्पताल (MCH) भवन में चलत ए सुविधा ले अब तक 300 ले जादा मरीज मन के इलाज करे जा चुके हे।

जानकारी के मुताबिक, जिला अस्पताल में डायलिसिस के सुविधा 8 दिसंबर 2022 के प्रधानमंत्री राष्ट्रीय डायलिसिस कार्यक्रम ‘जीवनधारा’ के तहत सुरु करे गे रहिस। सुरु ले ही इहां मरीज मन के मुफ्त (निःशुल्क) डायलिसिस करे जावत हे। अभी ए यूनिट में 5 ठन आधुनिक मशीन लगे हे, जेकर ले अब तक 7,000 ले जादा डायलिसिस सेशन सफलतापूर्वक पूरा हो चुके हे। हर महीना करीब 300 सेशन होवत हे अऊ अभी 27 मरीज मन नियमित रूप ले इहां अपन इलाज करवावत हें।

ए यूनिट के देख-रेख एम.डी. मेडिसिन विशेषज्ञ डॉ. अस्मिता श्रीवास्तव अऊ सिविल सर्जन डॉ. लोकेश साहू करत हें। डायलिसिस टीम के कहना हे कि जम्मो काम नियम अऊ सुरक्षा के साथ करे जाथे। मशीन मन के समय-समय में जांच अऊ मेंटेनेंस घलो करे जाथे ताकि इलाज में कोनो कमी झन आय। सबले बड़े बात ये हे कि ए इलाज बर एको रुपया नइ लागे, ये पूरा मुफ्त हे।

मिलीस आर्थिक राहत डायलिसिस यूनिट खुले के पहिली मरीज मन ला इलाज बर बड़े सहर मन में जाय ला पड़त रहिस। जेकर ले समय अऊ पइसा दुनो बरबाद होवत रहिस अऊ मरीज मन ला भारी तनाव घलो होत रहिस। अब अपन जिला में ही इलाज मिले ले मरीज मन के पइसा बाचत हे अऊ ओमन ला दूरिहा जाय के झंझट ले घलो मुक्ती मिल गे हे।

मरीज के अनुभव ग्राम ढ़ारा के रहइया 51 साल के श्रीमती कांति साहू ह बताइस कि ओ मन पिछले साढ़े तीन साल ले डायलिसिस करवावत हें। पहिली ओ मन ला मुंगेली अऊ दुर्ग जाय ला पड़त रहिस, जेकर ले बहुतेच तकलीफ होत रहिस। अब पिछले डेढ़ साल ले ओ मन बेमेतरा जिला अस्पताल में ही हफ्ता में तीन दिन डायलिसिस करवावत हें। कांति साहू ह बताइस कि इहां मुफ्त इलाज के साथ-साथ डॉक्टर अऊ स्टाफ के सुभाव घलो बहुतेच बने हे, जेकर ले ओमन ला बड़े राहत मिले हे।