दिशा दर्शन भ्रमण आत्मनिर्भर बने के बड़ माध्यम: मंत्री लक्ष्मी राजवाड़े

51 महिला मन ला मिलीस लघु उद्योग के व्यावहारिक  ज्ञान

रायपुर: महिला एवं बाल विकास मंत्री लक्ष्मी राजवाड़े के पहल अउ मार्गदर्शन म चलत “दिशा दर्शन भ्रमण” योजना ह महिला मन ला आर्थिक रूप ले मजबूत बनाय बर तेजी ले आगू बढ़त हे। ए रद्दा म सूरजपुर जिला के लगभग 51 महिला मन, जो अलग-अलग स्व सहायता समूह मन ले जुड़े हें, ओ मन पढ़ाई अउ सीखे के उदेस (अध्ययन भ्रमण) ले रायपुर पहुँचिन।

भ्रमण के बखत महिला मन ह रायपुर-खरोरा म स्थित सोया प्रोसेसिंग प्लांट ला देखिन अउ ओकर उत्पादन, प्रसंस्करण (processing), पैकेजिंग अउ बेचे के तरीका (marketing) ला बिस्तार ले समझिन। ए प्रशिक्षण ला पाय के बाद महिला मन म अपन खुद के काम-धंधा सुरू करे बर नवा आत्मविश्वास जगिस अउ ओ मन अपन इलाका म छोटे स्तर म प्लांट लगा के काम करे के इच्छा जताइन।

ए मउका म मंत्री लक्ष्मी राजवाड़े ह खुद प्लांट म मौजूद रहीन अउ महिला मन ले सीधा गोठ-बात करके ओकर उत्साह बढ़ाइन। ओ मन कहिन कि राज्य सरकार ह महिला मन ला आत्मनिर्भर बनाय बर लगातर कोसिस करत हे। अइसन भ्रमण कार्यक्रम ले महिला मन ला काम-काज के व्यावहारिक अनुभव मिलथे, जेकर ले ओ मन ला उद्योग के छेतर म आगू बढ़े बर प्रेरणा मिलथे।

मंत्री श्रीमती राजवाड़े ह कहिन कि जउन महिला स्व सहायता समूह सोया प्रोसेसिंग जइसन छोटे उद्योग (लघु उद्योग) लगाय बर चाहथें, ओ मन ला सरकार कोति ले हर संभव मदद दियें जाही। ओ मन अधिकारी मन ला निरदेस दीन कि प्रशिक्षण पाय महिला मन ला सरकारी योजना ले जोड़के ओ मन ला पैसा-कउड़ी के मदद (वित्तीय सहायता), तकनीकी जानकारी अउ सामान ला बेचे के सुविधा उपलब्ध कराय जाय।

ओ मन ए घलो कहिन कि स्व सहायता समूह के माध्यम ले महिला मन न केवल आर्थिक रूप ले मजबूत बनत हें, बल्कि समाज म अगुवाई करत दूसर महिला मन बर घलो प्रेरणा बनत हें। मंत्री श्रीमती राजवाड़े ह कहिन कि ‘दिशा दर्शन भ्रमण योजना’ के जरिए राज्य सरकार ह महिला मन ला गियान, कला अउ मउका देके ओ मन ला आत्मनिर्भरता के डाहर मजबूती ले आगू बढ़ावत हे।