अनुसासित मेहनत, तप अऊ त्याग ले मिलथे सफलता: सोनमणि बोरा
- प्रमुख सचिव ह पीएम सेजस बिद्यालय कुम्हारी के निरिक्षण करिन
- लइका मन ला बिद्या पढ़े के साथ-साथ सिछार्थी अऊ अभ्यार्थी घलो बनना चाहिये
रायपुर, आदिम जाति, अनुसूचित जाति अऊ पिछड़ा वर्ग अऊ अल्पसंख्यक विकास विभाग के प्रमुख सचिव अऊ दुर्ग जिला के प्रभारी सचिव सोनमणि बोरा ह आज दुर्ग जिला के कुम्हारी म स्थित पीएम बिद्यालय के निरिक्षण करिन। ओमन निरिक्षण के बखत स्कूल के जम्मो विभाग ला बारीकी ले देखिन। श्री बोरा ह स्कूल के लाइब्रेरी, बिग्यान प्रयोगशाला, अटल लैब, स्पोर्ट्स रूम के साथे-साथ जम्मो क्लास के मुआयना करिन। ओमन पराइमेरी विभाग म चलत ‘जादुई पिटारा’ अउ मिडिल विभाग म स्मार्ट क्लास के माध्यम ले होवत पढ़ाई-लिखाई ला देख के खुसी जताइन। ओमन लइका मन ले सहज भाव म गोठ-बात करिन अऊ पढ़ाई अऊ खेलकूद के जानकारी लीन। ए मऊका म कलेक्टर अभिजीत सिंह घलो संग म रहिन।
प्रमुख सचिव श्री बोरा ह लइका मन ले गोठियावत कहिन कि अनुसासित मेहनत, तप अऊ त्याग ले ही सफलता मिलथे। ओमन पीएमश्री बिद्यालय के निरिक्षण के बखत लइका मन ले कहिन कि जीवन म सफलता पाय बर सुरु ले ही लइका मन ला बिद्या पढ़े के संग-संग गियान के पिपासु, सिछार्थी अऊ अभ्यार्थी घलो बनना चाहिये। ए बखत ओमन बिद्यालय के बढ़िया परीक्षा परिणाम अऊ लइका मन के उपलब्धि के तारीफ करिन अऊ जम्मो क्लास के टॉपर लइका मन ले मिल के ओमन ला सम्मानित घलो करिन। प्रमुख सचिव श्री बोरा अऊ कलेक्टर श्री सिंह ह लइका मन ला जीवन म लछ्य (लक्ष्य) बना के काम करे बर प्रेरित करिन अऊ ओमन ले पूछिन कि ओमन बड़े होके का बनहीं। ए सवाल म टॉपर ह सी.ए., साइबर इंजीनियर अऊ कलेक्टर बने के इच्छा जताइन। अधिकारी मन ह लइका मन ला उज्जल भविस्स बर सुभकामना दीन अऊ गुरुजी के मेहनत के तारीफ करत बिद्यालय के अऊ दूसर गतिविधि ला सराहनीय बताइन।
सम्मानित लइका मन म कक्षा 12वीं के नोनी रिया साहू, जेहर राज (राज्य) स्तर म चऊथा नंबर म आई हे। ओहिच कक्षा 10वीं के नोनी साक्षी देवांगन ह जिला स्तर म आठवां नंबर पाइस हे। कक्षा 8वीं म पायल रजानी अऊ नैतिक आमटे ह संकुल स्तर म पहिली अऊ दूसरा नंबर हासिल करिन। ओसने कक्षा 5वीं के नोनी शिवानी पटेल पहिली नंबर म रहिस, अऊ भव्या साहू अऊ रूपाली साहू ह दूसरा नंबर पाके स्कूल के मान बढ़ाइन।
