गरियाबंद। जिला कलेक्टर ह बड़ फइसला लेवत हुए बर्खास्त करे जा चुके 58 आंगनबाड़ी कार्यकर्ता, सहायिका अउ मिनी आंगनबाड़ी कार्यकर्ता मन ल पुन: बहाल कर दिस हे। आंदोलन के दउरान इमन ह बर्खास्त करे गे रहिस हे।
दरअसल 5 मार्च ले प्रदेश संगठन के आह्वान म आंगनबाड़ी कार्यकता मन ह हड़ताल सुरू कर दे रहिस हे। सासन ह कतको बार इमन ल नोटिस देके काम म लउटे के चेतावनी दीस, लेकिन काम म नइ लउटने म अउ 41 दिन तक आंदोलन करे के चलत 3 अप्रैल 2018 के जिला के 58 आंगनबाड़ी कार्यकर्ता , सहायिका अउ मिनी आंगनबाड़ी कार्यकर्ता मन ल बर्खास्त कर दे गिस। जेकर बाद ले बीते 3 महीना ले उंखर परिवार मन म नउकरी जाय ले लेके काफी परेसानी उठाइन हे।
बर्खास्त आंगनबाड़ी कार्यकर्ता म के कहिना हे के ‘आंदोलन के बाद सरकार ह आंगनबाड़ी कार्यकर्ता मन के जे मांगें मानिस हे ओखर ले प्रदेस के करीब 1 लाख आंगनबाड़ी कार्यकर्ता मन, सहायिका मन ल लाभ होइस हे, लेकिन उंखर हक दिलाय बर आंदोलन करइया अउ बर्खास्त होवइया प्रदेस के 3000 आंगनबाड़ी कार्यकर्ता अउ सहायिका मन के आघू बर्खास्त होय के बाद ले परिवार चलाय के परेसानी खड़े हो गिस हे।’ इहीं मन म बर्खास्त आंगनबाड़ी कार्यकर्ता अउ सहायिका मन म 58 गरियाबंद जिला के घलो रहिन हे। जेला कलेक्टर ह बड़ राहत देवत हुए उंखर बर्खास्तगी ल रद्द करत हुए उमन ल बहाल कर दिस हे। उहें बहाली खबर सुनत ही ये आंगनबाड़ी कार्यकर्ता मन अउ सहायिका मन के चेहरे म मुस्कान आ गिस हे अउ उंखर परिवार मन ह घलो राहत के सांस लीस हे।
