स्मगलिंग करत पकड़े गिस जनपद सदस्य, 47 किलो गांजा के संग चार गिरफ्तार

जय जोहार सूरजपुर…. रामानुजनगर म पुलिस ह जनपद सदस्य समेत चार लोग मन ल गांजा तस्करी करत रंगे हाथों गिरफ्तार करिस। पुलिस ह आरोपी मन के कार ले 47 किलो गांजा बरामद करिस। जब्त गांजा के कीमत आठ लाख रूपिया आंकी गिस हे। बतावत जात हे कि आरोपी जनपद सदस्य अपन साथी मन के संग मिलके इलाका म खपाने के इरादा ल गांजा ले जात रहिस। पुलिस आरोपी मन ले पूछताछ करत हे।

मिली जानकारी के मुताबिक पुलिस ल मुखबिर मन के हवाले सूचना मिलिस कि ओडिशा ले गांजा के बड़े खेप ल छत्तीसगढ़ लाए जावत हे। सूचना के आधार म पुलिस ह इलाका म घेराबंधी करके वाहन मन के जांच शुरू करिस। ये दौरान रात म पुलिस ल ओडिशा के तरफ ले कार आवत दिखाई दिस, जेला रूकवाकर ओखर तलाशी लिस, कार म गांजा के 47 पैकेट मिलिस। पकड़े गिस चार आरोपी मन म एक आरोपी रामानुजनगर जनपद पंचायत के बीडीसी सदस्य निकलिस, जेन ह हाल ही म चुनाव जीतके जनपद सदस्य बने रहिस ।