खुद के खर्च म दिव्यांग लड़की बनात हे मास्क, त बाहरी लोग मन के प्रवेश म रोक लगाए बर महिला मन ह संभाले हे मोर्चा
जय जोहार बालोद…. कोरोना महामारी ह देश के संगेसंग पूरा विश्व म पैर पसार चुके हे। छत्तीसगढ़ घलो ए महामारी ले अछूता नई रहिस। प्रदेश म अब तक कोरोना ले संक्रमण के 18 मामला सामने आ चुके हे। जेमा 10 कोरोना मरीज ह ठीक होके घर जा चुके हे। 11 नवा मामला कोरबा जिला के कटघोरा ले आए हे। जेखर कनेक्शन तबलीगी से बताए जात हे। ए जंग म राज्य सरकार ह प्रदेश वासी मन बर कोई न कोई नवा प्लान लेके आवत हे। जेखर ले लोग मन ल कोनो प्रकार ले कोई दिक्कत न हो। लेकिन ए बीच कई अईसे लोग मन हे, जेन जरूरतमंद के सहायता कर मिसाल पेश करत हे। अइसा ही कुछु देखे बर मिलिस, बालोद जिला के वनांचल क्षेत्र के ग्राम घोटिया म, जिहां रोशनी कोरोना ले लड़ाई म अपन पूरा सहयोग देवत हे। जेन पैर ले दिव्यांग होए के बाद भी अपन खर्च म मास्क बनात हे अऊ के पंचायत प्रतिनिधि मन ल नि:शुल्क वितरण करत हे।
इही गांव म अऊ दु महिला मन अऊ तीन पुरुष हे, जेन अपन घर म बइठे मास्क सिलाई कर पंचायत ल देवत हे, जे मन ल पंचायत प्रतिनिधि मन के तरफ ले गांव म ग्रामीण मन ल वितरण करे जात हे।
त ऊहचे गांव के बाहर सरहद म बेरिगेट बना के खड़े गांव के महिला मन ह बाहरी व्यक्ति ल गांव म आए ल अऊ गांव के व्यक्ति ल बेवजह बाहर जाए ल रोकत हे अऊ गांव ल कोरोना के संक्रमण ले बचाए बर कमान ल सम्हालत हे। जेमा गांव के महिला सरपंच ममता मंडावी ह ग्रामीण मन के संग खड़े होके गांव के नेतृत्व ल सम्हालत हे।
ग्राम पेंड्री म पुरुष गांव के बाहर बेरिगेट बना के को- कोई भी, रो- रोड पर, ना- नहीं निकले, घर म सुरक्षित रहे लिखे संदेश के संग गांव के बाहरी व्यक्ति मन ल गांव म आए ल रोकत हे।
