रायपुर। छत्तीसगढ़ के सिक्छाकर्मी मन के संविलियन की प्रक्रिया ल तेजी ले निपटाय जात हे। इहीं महीना के 14 अउ 15 तारीख के प्रक्रिया पूरा होय के बाद ले सबो सिक्छाकर्मी सिक्छा बेभाग के कर्मचारी हो जाही। सिक्छा बेभाग ह राजधानी समेत पूरा राज्य म एक ही दिन सिक्छाकर्मी मन के दस्तावेजी संविलियन करे के तइयारी के हे। राजधानी म गवर्नमेंट स्कूल अउ दानी स्कूल म दू दिन के सिविर लगाय जात हे। जेमा सिक्छाकर्मी मन के कर्मचारी पहचान पत्र यानी एम्प्लाई आईडी बनाय जाही। उंखर सेवा पुस्तिका के हस्तांरन घलो सिक्छा बेभाग म कर देय जाही। अइसे सिक्छाकर्मी मन जेखर अभु तक ले भविस्य निधि यानी प्रोविडेंट फंड नइ कटत हे, इही दिन उंखर परमानेंट रिटायरमेंट अकाउंट नंबर घलो जनरेट कर देय जाही। सिविर म पेन कारड अउ बैंक के पासबुक के फोटो कॉपी के संग लाय के निरदेश देय गेहे। इंखर संग ही अगस्त के पहिली तारीख ले सिक्छाकर्मी मन ल नियमित रूप ले वेतन मिल सकही। उमन ल कर्मचारी पहिचान नंबर यानी एम्प्लाई आईडी नंबर देय जाही। उमन के सेवा पुस्तिका के संधारण करे जाही। जे कमी रही गेहे, ओला दूर करे जाही। परमानेंट रिटायरमेंट अकाउंट नंबर बर सिक्छाकर्मी मन ले आवेदन लेके जनरेट करही। वेतन आहरन बर व्यक्तिगत डेटा कोड बनाय जाही।
शहरी अउ नगरीय निकाय के स्कूल मन बर शनिवार अउ ग्रामीन इलाका मन के स्कूल मन म पढ़ाइया सिक्छाकर्मी मन बर रविवार के सिविर लगाय जाही। शिविर म स्कूलवार प्रक्रिया निपटाय जाही। प्राचार्या अउ प्रधान पाठक मन ल निरदेश देय गे हे के वो मन अपन स्कूल के सबो सिक्छाकर्मी मन ल लेके एक संघरा सिविर म पहुंचय।
सिक्छाकर्मी मन ल सिविर म सबो ल अपन एम्प्लाई डाटा फार्म भरके लाना होही। फारम ल राज्य के सबो विकासखंड शिक्षा अधिकारी कार्यालय म उपलब्ध करवाय गेहे। सिक्छाकर्मी संगठन के प्रमुख मन ल घलो फारम दे जा चुके हे।
