रायपुर । अंबेडकर अस्पताल म एंबुलेंस को दरवाजा नइ खुले ले लइका के मउत मामला म जीवीके कंपनी के सीईओ के खेलाफ एफआईआर दरज कर ले गिस हे। सीएमओ केएस शांडिल्य के रिपोर्ट म विक्रम सिंह के खेलाफ मउदहापारा थाना म मामला दरज कर ले गिस ।
मंगलवार के संजीवनी 108 एंबुलेंस के दरवाजा नइ खुले ले एक मासूम के मउत हो गिस हे। बताय जात हे के डेढ़ माह के लइका कुंज के दिल म छेद रहिस हे। जेखर इलाज बर रायपुर के अंबेडकर अस्पताल म लाय गिस । परिवार बिहार के गया जिला के रहइया हे। परिजन लइका ल लेके ट्रेन ले रायपुर आइन, लइका के जादा तबीयत बिगड़े ले उमन इमरजेंसी सेवा संजीवनी एक्सप्रेस ल बुलाय रहिन हे।
लइका जब अंबेडकर अस्पताल म लाय गिस अउ ओला बाहिर निकाले बर एंबुलेंस ल दरवाजा खोलिस त नइ खुलिस। कुछु लोगन मन के मदद ले खिड़की के कांच ल तोड़ के लइका ल बाहिर निकाले गिस । लेकिन तब तक ओखर मउत हो चुके रहिस हे। घटना के बाद मामला म मुख्यमंत्री रमन सिंह ह कड़ा कार्रवाई के संकेत देय रहिस हे।
