पीएम के सपना म ग्रहण, इहां उज्जवला गैस योजना के नाम म ऐंठे जात हे पइसा

बालोद। देश म केंद्र सरकार ह परिवार मन के महिला मन के चेहर म खुशी लाय बर 1 मई 2016 के उज्जवला गैस योजना सुरू करिस हे। ये योजना म त बड़े संख्या म गैस कनेक्शन बांटे गे हे अउ बांटे जात हे। लेकिन कुछु लोगन मन ये ला कमाई के जरिया बना डाले हे ।अइसे ही एक मामला गुरूर म आघू आइस हे । आवो देखथन कि कोन मन लगा थे पीएम के सपना म ग्रहण एउ केती उज्वला योजना के नाम म ऐंठे जात हे पइसा।
गुरूर विकास खंड म गैस कनेक्न दिलाय के नाम म कुछु लोगन मन फर्जी गैस एजेंट बनके ग्रामीन मन ले 200-200 रु.के ठगी करत रिहिन हे। ग्रामीण वितरक गैस एजेंसी के सिकायत म गुरुर पुलिस ह ठगी के आरोपी अमित सिन्हा ल गिरफ्तार करिस हे। युवक के तीर ले पुलिस ह प्रधानमन्त्री उज्वला योजना के 70 खाली व भरे फ़ार्म सहित ग्रामीन मन ल दे गे फर्जी रसीद व 2230 रुपिया नगद समेत मोटर सायकल बरामद करिस ।
दरअसल, गुरुर म विधायक भैय्या राम सिन्हा के गैस एजेंसी के एजेंट बताके परसुली के एक युवक अमित सिंन्हा ह उज्ज्वला योजना म गैस कनेक्शन देय के नाम म पांच गांव ले 50 ले जादा लोगन ले 200-250 रुपिया के वसूली करिस हे। येकर सिकायत एजेंसी ल मिलिस त गुरुर गैस एजेंसी के तीन कर्मचारी ग्राम पेंवरों म वसूली करत आरोपी अमित सिन्हा ल पकड़िस हे, लेकिन वो ह बाइक ले फरार हो गे।
ग्रामीण गैस एजेंसी के आपरेटर लोमन यादव ह लिखित म मामला के सूचना गुरुर थाना करिस हे। पुलिस ह मामला के गंभीरता ले लेवत हुए मामला के जाँच पड़ताल करिन अउ ये मामला म परसुली निवासी आरोपी अमित सिन्हा ल हिरासत म ले गिस हे। आरोपी के खिलाफ धारा 419,420 के तहत अपराध दर्ज कर के आघू के कार्यवाही म जुट गिस हे।