अइसे कइसे गढ़ही छात्र मन अपन भविस्य

महासमुंद । ‘स्कूल आ पढ़े बर, जिनगी ला गढ़े बर’ ये स्लोगन ह छात्र मन ल अपना भविस्य गढ़े बर सिक्छा के महत्व ल दरसाथे। लेकिन छत्तीसगढ़ के सिक्छा बिभाग के बेवस्था ह सरकारी स्कूल म सिक्छा के हालत उजागर करत हे। अब कइसे लइकामन ह अइसन स्कूल में सिक्छा ग्रहन कर के अपन भविस्य ल गढ़ही।
महासमुंद जिला म सिक्छा बिभाग विभाग के दाव मन के एक बार फेर पोल खुलत नज़र आलत हे। जिला म 1280 प्राथमिक स्कूल अउ 480 मीडिल स्कूल संचालित होवत हे। ये 1760 सरकारी स्कूल मन म एक लाख 35 हजार छात्र-छात्रा मन ह अपन भविस्य गढ़े बर आथे। सिक्छा सत्र 2018-19 ल शुरू होय करीबन डेढ़ माह बीत चुके हे, लेकिन जिला के करीब 6 हजार छात्र-छात्रा मन पाठ्य पुस्तक मन बर तरसत हे।
जनवरी 2018 म सिक्छा बिभाग के संचानालय ले 2018-19 के सत्र ले एक ब्लॉक के दो स्कूल मन म अंग्रेजी माध्यम के पढ़ाई सुरू करे के आदेस जारी करे रहिस हे, जेकर बाद जिला के पांच ब्लॉक के पांच प्राथमिक अउ पांच मिडिल स्कूल मन म अंग्रेजी माध्यम से पढ़ाई बर लइका मन के प्रवेस कर हे। ये लइका मन ल सिक्छा बिभाग डेढ़ माह बाद न त पुस्तक मन मिलींस अउ न ही पढ़ाय बर सिक्छक मिल सकिस।