भाजपा नेता मन अउ स्टार प्रचारक मन के काली ले सुरु हो ही चुनावी दउरा

रायपुर. भारतीय जनता पार्टी के चुनावी अभियान अब पूरा रफ्तार म हे. अउ पार्टी के स्टार प्रचारक मन के विभिन्न लोकसभा क्षेत्र मन म धुंआधार दउरा सुरू हो चुके हे.

भाजपा के राष्ट्रीय उपाध्यक्ष अउ पूर्व मुख्यमंत्री डॉ. रमन सिंह गुरुवार 28 मार्च के बेमेतरा जिला के साजा पहुंच के कार्यकर्ता सम्मेलन ल संबोधित करही. डॉ. सिंह बिहनिया 11.30 बजे हेलिकॉप्टर ले रवाना हो के साजा पहुंचही, जिहां उमन नवा बाजार चउक म दुपहर 12 बजे ले आहूत कार्यकर्ता सम्मेलन म हिस्सा लिही. ये विधानसभा स्तरीय कार्यकर्ता सम्मेलन के बाद दुपहर ढाई बजे तक पूर्व मुख्यमंत्री डॉ. सिंह वापिस राजधानी लउट आ ही.

प्रदेश विधानसभा म नेता प्रतिपक्ष धरमलाल कौशिक काली 28 मार्च के बिल्हा अउ बिलासपुर म कार्यकर्ता सम्मेलन ल संबोधित कर ही. नेता प्रतिपक्ष कौशिक सड़क मार्ग ले बिहनिया 11 बजे बिल्हा पहुंच के कार्यकर्ता सम्मेलन म भाग
लि ही. दुपहर डेढ़ बजे कौशिक बिलासपुर पहुंच ही अउ उहां आहूत विधानसभा स्तरीय कार्यकर्ता सम्मेलन ल संबोधित कर ही. अपराह्न चार बजे उमन परसदा लउटही.

भाजपा प्रदेशाध्यक्ष विक्रम उसेंडी काली 28 मार्च के सड़क मार्ग ले वैशालीनगर जाही. बिहनिया 11 बजे रायपुर ले निकल के उसेंडी कुम्हारी, भिलाई-3 अउ पावर हाउस म स्वागत कार्यक्रम म भाग ले के दुपहर 12 बजे वैशाली नगर पहुंचही. जिहां उमन विधानसभा स्तरीय कार्यकर्ता सम्मेलन अउ स्थानीय कार्यक्रम मन म भाग ले के बाद अपराह्न 4 बजे तक रायपुर लउट ही.