हरेक जिला म खुलही पहिली ले बारहवीं तक के अंग्रेजी स्कूल… भूपेश सरकार के पहल

जय जाेहार रायपुर….सरकार प्रदेश के हरेक जिला म पहिली ले बारहवीं कक्षा तक के एक-एक अंग्रेजी माध्यम के स्कूल खोले बर तैयारी करत हे। एखर बर स्कूल शिक्षा विभाग ह प्रस्ताव तैयार करत हे। अंग्रेजी माध्यम स्कूल बर जिला मन ले प्रस्ताव भी मंगाए जात हे। बता दन कि पिछले कुछु वर्ष मन म हरेक वर्ग के पालक पर अंग्रेजी शिक्षा सिर चढ़ के बोलत हे। एखर चलत निजी स्कूल ह काफी फलत – फूलत हे। पर्याप्त सुविधा नई होए के बाद भी निजी स्कूल अंग्रेजी शिक्षा बर बड़े रकम पालक मन ले वसूलत हे।

एला देखत हुए सरकार दिल्ली के तर्ज म हरेक जिला म प्राइमरी ले हायर सेकेण्डरी तक अंग्रेजी माध्यम के स्कूल खोले बर के तैयारी म हे। मुख्यमंत्री भूपेश बघेल के निर्देश पर स्कूल शिक्षा विभाग ह प्रस्ताव तैयार करत हे अऊ अंग्रेजी माध्यम स्कूल खोले बर के तैयारी शुरू कर दे हे। इहां पहिली ले बारहवीं कक्षा म बच्चा मन ल प्रवेश दे जाही। प्राप्त जानकारी के अनुसार ए स्कूल मन म प्रारंभ म वर्तमान म संचालित अंग्रेजी माध्यम के बजाय संविदा शिक्षक मन के नियुक्ति करे जाही। विभाग ह जिला शिक्षा अधिकारी मन ले स्कूल के नाम समेत अन्य प्रस्ताव मंगाइस हे।