कई जिला के शराब दुकान म छापा, जादा कीमत म शराब बेचईया कर्मचारी ल करिस बर्खास्त

रायपुर। आबकारी विभाग के राज्यस्तरीय उड़नदस्ता के टीम ने राजधानी के मालवीय रोड, टिकरापारा, लाखेनगर, पुरानी बस्ती, टाटीबंध, मांढर, माना अउ अभनपुर के देशी-विदेशी शराब दुकान म छापा मारिन हे। ये दउरान निर्धारित मूल्य के जादा कीमत म शराब बेचईया कई झन कर्मचारी ऊपर कार्रवाई करत बर्खास्त करिन हे। संगे-संग प्लेसमेंट एजेंसी ऊपर घलोक दू लाख रूपिया के जुर्माना लगईस हे।

जानकारी के मुताबिक रायपुर संभागीय उड़नदस्ता आबकारी टीम ह शराब दुकान मन के जांच करे बर निकले रिहिन हे। ये दउरान मांढर म देशी शराब दुकान म प्लेन अउ मसाला दारू ल निर्धारित मूल्य ले 10-10 रूपए जादा कीमत म बेचत रिहिस। जेकर बर दू कर्मचारी ऊपर प्रकरण दर्ज करिन हे। संग म जिला म नियुक्त प्लेसमेंट एजेंसी ऊपर घलो प्रकरण दर्ज कर सीएसएमसीएल द्वारा दू लाख रूपिया के जुर्माना लगाए गिस हे।

इही तरह ले संभागीय उड़नदस्ता आबकारी बिलासपुर के टीम ह सरकंडा, राजकिशोर, अशोक नगर, सीपत अउ वसुंधरा नगर के शराब दुकान के जांच करिस हे। बस्तर के टीम ह घलो शराब दुकान के जांच करिन हे, जिहां उचित मूल्य म शराब बेचते पाए गिन हे।