आबकारी मंत्री कवासी लखमा के गजब सलाह, पेट म दरद हे त पी ले मउहा दारू

धमतरी। छत्तीसगढ़ के आबकारी मंत्री कवासी लखमा हा एक बार फेर अपन बयान के सेती चर्चा म हें। ए दरी ओमन पेट म दरद होय ले मउहा दारू पीये के सलाह दे हें। ओमन केहे हें कि बस्तर म हर बीमारी के इलाज होथे।

आबकारी मंत्री कवासी लखमा हा गुरुवार के हरेली पर्व के मौका म होय कार्यक्रम म बोलत रिहिस हे।

असल बात ये आय कि रमन सरकार म मंत्री रेहे अजय चंद्राकर हा कांग्रेस सरकार के योजना मन ला लेके तंज कसे रिहिन। राज्य सरकार के फ्लैगशिप कार्यक्रम मजाक उड़ाय रिहिन। ओमन केहे रिहिन कि, जै हो नरवा घुरूवा बारी..पी के मस्त रहो संगवारी।

एकर बाद धमतरी पहुंचे मंत्री कवासी लखमा हा पूर्व मंत्री अजय चंद्राकर के ऊपर निसाना साधिस। ओमन किहिन कि सरकार के काम ला देखके भाजपा ला दरद होवत हे। ‘अजय चंद्राकर के पेट म दरद हे त मउहा के दारू पी लेवंय, ठीक हो जाही।

लखमा हा यहू किहिन कि भाजपा के सरकार नागपुर ले चलत रिहिस। हमर सरकार किसान, कार्यकर्ता मन से चलथे।