छत्तीसगढ़ म गुणवत्तायुक्त स्वास्थ्य सुविधा के विस्तार, अब खून के जांच बर नइ जाना पड़े पैथोलॉजी लैब

रायपुर। मुख्यमंत्री विष्णुदेव साय के नेतृत्व म छत्तीसगढ़ म गुणवत्तायुक्त स्वास्थ्य सुविधा के लगातार विस्तार होवत हे। इही क्रम म स्वास्थ्य मंत्री श्याम बिहारी जायसवाल के निर्देश म डॉ. भीमराव अम्बेडकर स्मृति चिकित्सालय के विभिन्न वार्ड म भर्ती मरीज के परिजन मन ल खून के जांच कराए बर सैंपल लेके पैथोलॉजी लैब नइ जाना पड़हि। अस्पताल म भर्ती अंतः रोगी मरीज मन बर प्रबंधन ह बड़का फैसला लिन हे। अब वार्ड म भर्ती जम्मों मरीज मन के पैथोलॉजिकल जांच बर उखर ब्लड सैंपल वार्ड म एकत्रित करके वार्ड बॉय ह पैथोलैब तक पहुंचाहि अउ जांच के बाद ब्लड रिपोर्ट एकत्रित करके ओखर ले संबंधित वार्ड म ऑन ड्यूटी नर्स ल देय जाहि। अम्बेडकर अस्पताल अधीक्षक डॉ. संतोष सोनकर ह बतायिन कि प्रारंभिक तौर म मेडिसिन मेल वार्ड क्र. 8 अउ 9 अउ मेडिसिन फीमेल वार्ड क्रं. 10 अउ 11 म भर्ती मरीज मन बर ए व्यवस्था शुरू करे गे हे। धीरे-धीरे जम्मों वार्ड म सैंपल कलेक्शन सिस्टम के ए व्यवस्था लागू हो जाए के बाद मरीज मन ल सबले बड़का राहत मिलही अउ उखर अटेंडर ल घलो जांच बर ब्लड सैंपल ल लेके पैथोलॉजी लैब तक नई जाए ल पड़हि। रिपोर्ट घलो समय म मिल जाहि।

बता दन कि 1340 बेड के अम्बेडकर अस्पताल म रोजाना 950 ले घलो अधिक मरीज भर्ती रथे। उहें प्रतिदिन लगभग 260 नवा मरीज अतः रोगी विभाग (आईपीडी) म भर्ती होवत हे। इहाँ विभिन्न विभाग के बाह्य रोगी विभाग (ओपीडी) म अवइया  मरीज मन के संख्या प्रतिदिन लगभग दु ले ढाई हजार रथे। ओपीडी के अलावा इमरजेंसी म अवइया मरीज मन बर सप्ताह के सात दिन चौबीस घंटा खून जांच अउ रेडियोलॉजी जांच के व्यवस्था रथे।