फर्जी जाति प्रमाण पत्र : 192 साहेब अउ बाबू मन के खिलाफ जांच

रायपुर । छत्तीसगढ़ प्रदेश म फर्जी जाति प्रमाण पत्र के भरोसा सरकारी नौकरी करइया साहेब अउ बाबू मन के खेलाफ जांच चलत हे। उंहे बीते एक बछर म 11 सरकारी करमचारी मन के खिलाफ उच्चस्तरीय छानबीन समिति हँ जाँच पूरा करके आदेस पारित कर डारे हावय।

विधानसभा म आदिमजाति कल्याण मंत्री डा. प्रेमसाय सिंह हँ सत्तापक्ष के सदस्य मोहन मरकाम के एक अतारांकित सवाल के लिखित जुवाब म ये जानकारी दिन। अतारांकित सवाल के जरिए मोहन मरकाम हँ प्रदेष म फर्जी जाति प्रमाण के अधार म नौकरी करइया सरकारी करमचारी मन जानकारी माँगिन।

संगे संग वोह इहू पूछिन 15 जनवरी 2019 के स्थिति म कतेक झन शासकीय सेवक मन के खिलाफ जाँच चलत हे। उँहेचे बछर 2018 म जनवरी ले दिसम्बर तक कतेक अकन प्रकरण के जाँच पूरा होइस। कतेक झन दोषी पाए गइन अउ का का कार्यवाही होइस।

मंत्री डा. प्रेमसाय सिंह हँ बताइन कि ये समे उच्च स्तरीय छानबीन समिति म 192 साहेब अउ बाबू मन के खिलाफ जाँच चलत हवय। उंहे बछर 2018 म जनवरी ले लेके दिसम्बर तक 11 प्रकरण म जाँच पूरा करके आदेश पारित करे जा चुके हे। एमा 6 प्रकरण म सरकारी करमचारी दोषी पाए गिस हे।

मंत्री मन बताइन के उच्च स्तरीय छानबीन समिति हँ संबंधित विभाग म कार्यवाही करे बर अपन आदेश के अभिप्रमाणित प्रति भेज दिए हे। जेमा एक झन दोषी करमचारी ल सेवा से हटा दिए गे हे। तीन प्रकरण म उच्च न्यायालय ले स्थगन मिले हे अउ एक ठो प्रकरण म शासकीय सेवक ल आरक्षण के कोनो लाभ नइ मिले हावय।