मशहूर सिंगर सुनील सोनी बनाही तू मेरा हीरो के गाना मन ल, निर्देशक संग होईस मीटिंग

जय जोहार रायपुर… छत्तीसगढ़ के जाने माने गायक अऊ संगीतकार सुनील सोनी ह तू मेरा हीरो फिलिम बर गीत बनाही, आज निर्देशक अनुपम वर्मा अऊ अभिनेता करन खान के संग ओखर मीटिंग माढ़े रिहिस ये मौक़ा म निर्देशक अनुपम वर्मा ह सुनील सोनी ल अपन फिलिम के गीत संगीत के पक्ष ल मजबूत बनाय बर टिप्स दिस अऊ किहिस कि अब तक के सबले बढ़िया गीत संगीत तैयार होना हे.

जल्द एखर शूटिंग शुरू होही एमा बतौर अभिनेता करन खान हे अऊ अभिनेत्री के तलाश जारी हे,आज के मीटिंग लगभग घंटा भर चलीस जेमा निर्देशक अऊ संगीतकार के आलावा दिलीप वर्मा अऊ दिलीप नाम पल्लिवार घलो रिहिन, बता दन कि ये मन घलो फिलिम के हिस्सा आय मगर पर्दा के पीछे ले सहयोग करथे.