मानसून म देरी होय से किसान मन हे चिंतित

मुंगेली, रायपुर।  मानसून म देरी होय के कारण किसान मन के माथा म चिंता के लकीर दिखई देवत हे, वो साल घलो जिले के कई गांव म सूखा के हालात रहिसि हे। इही सब ल देख के किसान मन ह चिंता करत हे कि कहूं यूहू साल ओ मन ला नुकसान उठाय बर मत पड़ जाए। मानसून आय के 15-20 दिन पहिली ले किसान मन ह अपन खेत खार के साफ- सफई अऊ खातु डाल के धान बोय के तैयारी कर डारे हे, फेर पानी नई गिरत हे तेखर सेती परेशान हे। आम लोगन मन ह घलो गर्मी ले राहत पाय बर बारिश के इंतजार करत हे। खेती-किसानी ल ले के बीज निगम के अधिकारी मन की माने तो वो मन ह घलो तैयारी कर डारे हे, अऊ सब्बे केंद्र म पर्याप्त मात्रा म खाद अऊ बीज के भंडारण कर डारे हे।