जय जोहार। (Raipur) सीएम भूपेश बघेल ह बिलासपुर जिला के तखतपुर विधानसभा के ग्राम बेलपान म आयोजित भेंट मुलाकात म गनियारी ल नगर पंचायत बनाय, ग्राम संकरीभांटा म मिनी स्टेडियम के निर्माण कराय के संग बेलपान मंदिर अउ मेला स्थल ल पर्यटन स्थल के रूप म विकसित करे समेत कई ठीन घोसना करीन ।
भेंट मुलाकात कार्यक्रम म सीएम भूपेश बघेल ह किहीन कि किसान मन के मेहनत अउ ओखर सहयोग ले राज्य म समर्थन मूल्य म करे जावत धान खरीदी म अब तक हमन ह 100 लाख मीट्रिक टन धान के खरीदी कर ले हन। किसान मन के संख्या अउ जमीन के रकबा दूनों म वृृद्धि होए हे । धान के उत्पादन घलो बढ़े हे। वोहा किहीन कि राज्य सरकार के ग्रामीण अर्थव्यवस्था ल मजबूत बनाय बर सुरू करे गे योजना अउ किसान हितैषी फइसला ले किसान मन ल ताक़त मिलत हे ।
सीएम भूपेश बघेल ह बेलपान के नर्मदा कुंड म पूजा अर्चना कर प्रदेस वासी मन के खुसहाली के कामना करीन । ओखर ग्राम बेलपान पहुंचे म स्थानीय जनप्रतिनिधि अउ ग्रामीण मन ह पुष्प गुच्छ, गुलदस्ता अउ सूत धागा की माला पहनाके आत्मीय स्वागत करीन। ए दउरान संसदीय सचिव अउ तखतपुर विधायक श्रीमती रश्मि आशीष सिंह समेत बड़का संख्या म ग्रामीण उपस्थित रिहीन।
