मुंगेली । मुंगेली जिला के पथरिया विकास खण्ड के गंगद्वारी गांव के सासकीय उचित मूल्य क् दुकान म किसान मन ल कम खाद मिले के मामला आघू आइस हे । सबो बोरी म 50 किलो वजन अंकित हे, लेकिन किसान मन ल बोरी मन म 45 किलो या 39 किलो खाद मिलत हे, जबकि किसान मन ले पूरा 50 किलो के पइसा लिये जात हे। जेला लेकर सइकड़ मन किसान मन ह दुकान के घेराव करत हुए जमके हंगामा करिन।
आज जिला म किसान मन ल उंखर फसल बीमा के भुगतान नइ मिलत हे। किसान मन ह करजा लेके खाद ले बर पहुंचिन । ओमा घलो कांटा मारे जात हे। खाद के पूरा पइसा लेके उमन ल आधा अधूरा अउ कम खाद देय जात हे। येकर नाराज किसान मन ह सासकीय उचित मूल्य के दुकान के घेराव करिन। उहें बिलासपुर कांग्रेस के पूरव जिला अध्यक्ष राजेन्द्र शुक्ला घलो गांव पहुंचिन अउ किसान मन के द्वारा करे गेहे सिकायत के बारे म दुकान संचालक ले घलो जानकारी लिस। जेमा म दुकान संचालक ह कम खाद होय म अनभिज्ञता जाहिर करत हुए मार्कफेड ले खाद मिले के बात कहिन। उहें किसान मन ह घलो बेभाग के ऊपर अफरा तफरी करे के आरोप लगाय उहें ये मामला म कांग्रेस नेता राजेंद्र शुक्ला ह सासन प्रसासन उपर किसान मन के संग धोखा करे के आरोप लगात हुए कहिन के अन्नदाता कहे जाने वाला किसान मन के सासन के द्वारा लगातार प्रताड़ित किया जात हे।
उमन ह सासन प्रसासन के मांग करिन के ये मामला मन म जल्द संज्ञान लेके किसान मन के पूरा खाद देय जाय। संग ही अफरा तफरी करइया मन के उपर जांच कर कड़ा कार्यवाही करे जाय। अन्यथा कांग्रेस पार्टी किसान मन के हित म उमन नियाया दिलाय बर सड़क के लड़ाई लड़ही। ये दउरान कांग्रेस नेता राजेन्द्र शुक्ला के अलावा पथरिया के पूरव ब्लॉक अध्यक्ष घनश्याम वर्मा, पथरिया ब्लॉक अध्यक्ष नेतराम साहू, राजा ठाकुर, विनोद साहू, खेमू साहू, पिलेश्वर वर्मा, साखा राम तोडें, जवाहर कुर्रे, राजेन्द्र,दिलीप, हितेश साहू समेत सइकड़ों के संख्या म किसान मवजूद हे।
