पांव परे बर झुकिस त काट दिस गला, गर्भवती बेटी बर बाप हा अतेक निर्दयी काबर बनगे, जाने बर पढ़व ये खबर…

मुंबई. गर्भवती बेटी हा अपन बाप के पांव परे बर जइसे झुकिस, बाप हा चाकू ले ओकर गला ला काट डारिस। बेटी बर बाप हा अतका निर्दयी काबर बनगे, ये जाने बर पढ़व ये सनसनीखेज खबर…

खबर मिले हे कि मुंबई के घाटकोपर इलाका म दू दिन पहिली 20 बरस उम्र के गर्भवती महिला के हत्या होए रिहिस। ओकर हत्या के गुत्थी सुलझ गे हे। जांच म पता चले हे कि महिला हा परिवार के मर्जी के खिलाफ कुछ महीना पहिली शादी करे रिहिस। जेकर ले नराज पिता हा अपन बेटी के गला काटके हत्या कर दिस। पुलिस ला महिला के खूनाखून शव इतवार के सुबह फुटपाथ म मिले रिहिस। आरोपी पिता ला गिरफ्तार कर ले गे हे।

पुलिस के कहना हे कि मीनाक्षी चौरसिया हा चार महीना के गर्भवती रिहिस। शनिवार के ओकर पिता राजकुमार चौरसिया हा बेटी के चेहरा अउ सिर म चाकू ले कई वार करिस, जेकर ले ओकर मौत होगे। बताए गे हे कि ये मन फरवरी म मध्यप्रदेश के सतना गे रिहिन, उहां मीनाक्षी हा बृजेश नाम के युवक के संग कोर्ट मैरिज कर लिस।

एती, पिता हा मीनाक्षी के शादी मुंबई के विरार म ही रहवइया एक लड़का संग तय कर दे रिहिस। एकर बर पूरा तैयारी हो गे रिहिस अउ कार्ड भी छप गे रिहिस। लेकिन प्रेम विवाह के बात सामने आईस त राजकुमार हा बेटी ले नाराज हो गे।

मीनाक्षी के बृजेश के संग भागे अउ अरेंज मैरिज के टूटे के कारण राजकुमार चौरसिया हा शर्मिंदा रिहिस। हालांकि, शादी ला स्वीकार करके अपन बेटी ला कभू गांव झन आबे केहे रिहिस। लेकिन हाल ही म जब मीनाक्षी हा एक समारोह म हिस्सा ले बर गांव पहुंचिस त राजकुमार गुस्सा होगे।

शनिवार शाम के दूनों झन के बीच फोन म बहस होगे। एकर बाद राजकुमार हा बेटी मीनाक्षी ला मिले बर बुलाइस। मुलाकात के दौरान जइसे ही मीनाक्षी हा पिता के पांव छूए बर झुकिस, ओ हा चाकू ले हमला कर दिस।