अपन मां ला खोजत-खोजत जंगल म भटक गे अढ़ई साल के लइका, भूख-प्यास म छूटगे परान
जशपुर। अपन मां ला खोजत-खोजत ढाई साल के एक लइका हा जंगल म भटकगे अउ भूख-प्यास ले ओकर मौत हो गे। लइका के शव 6 दिन बाद जंगल ले रविवार के बरामद होईस।
ये घटना छत्तीसगढ़ के जशपुर जिला के आय। जानकारी के मुताबिक, सिटी कोतवाली के सिटोंगा के आश्रित ग्राम चेंगोटोली निवासी पुनीता बाई हा सोमवार (29 जुलाई) के धान के रोपा लगाए बर गे रिहिस। एती ओकर ढाई साल के बेटा अर्पित हा अपन मां ला खोजत-खोजत शाम करीब 4 बजे हाथ म छाता लेके निकलगे। एकर बाद ले ओकर कुछु पता नई रिहिस।
पुनीता बाई हा पड़ोसी मन के मदद ले लइका के खोजबीन करिस, लेकिन ओकर कुछ पता नई चलिस। एकर बाद मंगलवार के कोतवाली म गुमशुदगी दर्ज कराए गिस।
एकर बाद पुलिस हा सिटोंगा म पांच दिन तक ग्रामीण मन के सहयोग ले सर्च ऑपरेशन चलावत रिहिस। ए बीच कोतवाली पुलिस के पास गांव काईकछार म एक वृद्व ग्रामीण ला अर्पित के छाता मिले के सूचना मिलिस, तब पुलिस के टीम हा ओकर ले पूछताछ करिस।
बुजुर्ग हा पुलिस टीम ला ओ इलाका के नजदीक झझर जंगल के सबले ऊंचा चोटी म ले गे। उहां आसपास सर्च करे म पुलिस ला अर्पित के चप्पल मिल गे। करीब 12 घंटा के खोजबीन के बाद पुलिस हा ओकर शव बरामद करिस।
Other Articles
दू दिन में दू झन बोहागे नदिया म, एक के मिलिस शव
